ივანიშვილმა საქართველოს წაართვა შანსი, გამხდარიყო მსოფლიოში დემოკრატიის პლატფორმის მატარებელი

ივანიშვილმა საქართველოს წაართვა შანსი, გამხდარიყო მსოფლიოში დემოკრატიის პლატფორმის მატარებელი - ხატია დეკანოიძე

პოლიტიკა - 15:49, 07 Jan, 2021

1150

ერთიანი ნაციონალური მოძრაობის წევრი ხატია დეკანოიძე სენატორ შაჰინის კომენტარს გამოეხმაურა და განაცხადა, რომ ის, რაც 2012 წლის არჩევნების შემდეგ მოხდა, როდესაც სააკაშვილმა მშვიდობიანად გადასცა ხელისუფლება ქართულ ოცნებას, ბიძინა ივანიშვილმა ეს დემოკრატიული მაგალითი მთლიანად ჩაკლა. დეკანოიძის თქმით, ივანიშვილის გუნდმა მთლიანად წაართვა საქართველოს შანსი, განხდარიყო მსოფლიოში დემოკრატიის მაგალითი:
"კაპიტოლიუმში წარმოთქმული სიტყვები, როდესაც იგი იხსენებს 2012 წლის საქართველოში ჩატარებულ არჩევნებს, როდესაც პრეზიდენტმა სააკაშვილმა და მისმა გუნდმა დემოკრატიულად, არჩევნების შედეგად გადააბარა ხელისუფლება "ქართულ ოცნებას" და ბიძინა ივანიშვილს, ეს არის ძალიან მნიშვნელოვანი იმ კუთხით, რომ ყველა კიდევ ერთხელ უნდა დავფიქრდეთ ამ 9 წლის განმავლობაში 2012 წლიდან, ამ მემკვიდრეობას რამდენად გადაუსვა ხაზი ბიძინა ივანიშვილმა, როგორ ჩაკლა ძალიან დიდი შანსი საქართველოსთვის მართლაც გამხდარიყო რეგიონში და არა მხოლოდ რეგიონში, მსოფლიოში დემოკრატიის, კეთილდღეობის, განვითარების და რეალურად უმნიშვნელოვანესი პლატფორმის მატარებელი და რამდენად მივიღეთ საპირისპირო მიტაცებული სახელმწიფო, დაყოფილი საზოგადოება და ხელისუფლების მიერ მუდმივად ზიზღის ამოფრქვევა წინა ხელისუფლების მიმართ" - განაცხადა დეკანოიძემ.

შეგახსენებთ, რომ კონგრესის განახლებულ სესიაზე სიტყვით გამოსვლის დროს სენატორმა შაჰინმა კაპიტოლიუმში ტრამპის მხარდამჭერების შეჭრის ფაქტზე და ტრამპის არჩევნებში დამარცხების მიუხედავად მის პოზიციაზე საქართველოს მაგალითი მოიყვანა და განაცხადა, რომ ქვეყნის მესამე პრეზიდენტმა მიხეილ სააკაშვილმა 2012 წლის არჩევნების შემდეგ მშვიდობიანად გადასცა ხელისუფლება ოლიგარქის გუნდს.