მთავარი არხის გენერალური დირექტორი ნიკა გვარამია ამერიკაში მიმდინარე მოვლენებს სოციალურ ქსელში ეხმიანება და აღნიშნავს, რომ ვიცე-პრეზიდენტი მაიკლ პენსი კაპიტოლიუმის მთავარი გმირია. როგორც გვარამია წერს, პენსი იყო პირველი, რომელიც ბოროტებას გაემიჯნა:

"ანტიგმირი გასაგებია, მაგრამ კაპიტოლიუმის მოვლენების ნამდვილი და მთავარი გმირი (ტრამპის) ვიცე-პრეზიდენტი და სენატის თავმჯდომარე მაიკ პენსია. ამ კაცმა გადამწყვეტი როლი ითამაშა არა მარტო როგორც სიმბოლომ, რომელიც პირველი გაემიჯნა სამყაროს ბოროტების მსახურებაში ჩამდგარ ტრამპს, არამედ თავისი საქმითაც - დემოკრატიის და ამერიკის კონსტიტუციის მსახურებით, ხელისუფლების (მათ შორის, საკუთარი ხელისუფლების) უზურპაციის მხარდაჭერის ნაცვლად.

ამ ვიდეოში ის აცხადებს პრეზიდენტ ბაიდენის და ვიცე-პრეზიდენტ ჰარისის გამარჯვებას და მანიაკი ტრამპის და ასევე საკუთარ დამარცხებას, როგორც ვიცე-პრეზიდენტობის კანდიდატის.

ნამდვილი გმირია! ასეთები ამოძრავებენ სამყაროს წინ და ამარჯვებინებენ სიკეთეს ბოროტებაზე!" - წერს გვარამია ფეისბუკის საკუთარ გვერდზე.

შეგახსენებთ, რომ ამერიკაში ტრამპის მხარდამჭერები ბაიდენის პრეზიდენტად არჩევას აპროტესტებენ და გადატრიალების მიზნით კაპიტოლიუმში შეიჭრნენ.