"პატრიოტთა ალიანსის" ლიდერი ირმა ინაშვილი "ქართული ოცნების" აღმასრულებელი მდივნის ირაკლი კობახიძის კომენტარს გამოეხმაურა და განაცხადა, რომ მისი ბედნიერება ხანმოკლე აღმოჩნდება, რადგან მალე დაინიშნება ვადამდელი საპარლამენტო არჩევნები და კობახიძე ის აღარ იქნება:

„დღეს ვითომ დასავლური კობახიძე ძერჟინსკი უკანონო პარლამენტიდან გველაპარაკება დასავლური ღირებულებების და დემოკრატიული ფასეულობების დაცვაზე. მინდა ვუპასუხო ამ იარლიყების მიკერების თემას, რაც მანკიერებაა ქართულ პოლიტიკაში და ჩვენ ბოლოს და ბოლოს უნდა დავამთავროთ პოლიტიკური იარლიყების მიკერების ასეთი უზნეო პრაქტიკა. მესმის, რომ კობახიძე ძერჟინსკი ბედნიერია, რომ არ ვარ პარლამენტში. მინდა ვუთხრა, რომ ის დროებითაა ბედნიერი, ძალიან ხანმოკლე აღმოჩნდება მისი ეს ბედნიერება. დაინიშნება ახალი არჩევნები და კობახიძე აღარ იქნება პარლამენტში. რუსული შემადგენელი, რაზეც ის საუბრობს, მე პარლამენტში ვსაუბრობდი საქართველოს ინტერესების დაცვაზე, ესაა რუსული შემადგენელი? მე ვლაპარაკობდი მშვიდობაზე, შერიგებაზე აფხაზებთან და ოსებთან, ესაა რუსული შემადგენელი? ახლა მე მინდა გითხრათ, რომ ვითონ დასავლური „ქართული ოცნება“ მთელი ამ წლების განმავლობაში კომუნისტურ საქართველოს აგებდა და ბოლოს მიაღწია, რომ კომუნისტური პარტიის რეჟიმში მოქმედებს ახლა. ვითომ დასავლურმა „ქართულმა ოცნებამ“ მოსპო პარლამენტში პოლიტიკური დებატები და პოლიტიკური პროცესი. ისე დაამახინჯეს და ერთ პარტიაზე მოირგეს რეგლამენტი, რომ მაგალითად, 4 დეპუტატი ფრაქციას ვერ ქმნის და არავითარი ბერკეტი არ აქვს, რომ პარლამენტში პოლიტიკური დებატი გაუწიოს „კომუნისტურ ოცნებას“. ძალიან დიდი იმედი მაქვს, რომ მოხდება დიდი გამოფხიზლება ამ ქვეყანაში და თვალის ახელა იმაზე, რა სახელმწიფოს ქმნის „ქართული ოცნება“, - განაცხადა ინაშვილმა.

შეგახსენებთ, რომ "პატრიოტთა ალიანსის" ოთხი წევრი გელა მიქაძე, ფრიდონ ინჯია, ავთანდილ ენუქიძე და დავით ზილფიმიანი პარლამენტში უკვე შევიდა. ამ ფაქტთან დაკავშირებით აღფრთოვანება ვერ დამალა კობახიძემ და ირმა ინაშვილზე განაცხადა, კარგია, რომ პარლამენტში რუსული შემადგენლობა რომ არ შევიდა.