"პატრიოტთა ალიანსის" კიდევ ერთი სადეპუტატო მანდატიანი წევრის გელა მიქაძის განცხადებით, არჩევნები გაყალბებულია, თუმცა ის პარლამენტში შევიდა არა როგორც „ნაცისტურ რაიხსტაგში", „ვიშისტურ მთავრობაში" ან აღა-მაჰმად-ხანის რაზმში, არამედ როგორც საქართველოს მოქალაქე ქართულ პარლამენტში.

მიქაძის განმარტებით, გაყალბებული არჩევნები არ უნდა იყოს პარლამენტში არშესვლის მიზეზი:

„1990 წელს პირველი არჩევნები არ იყო გაყალბებული. ახლაც არჩევნები ჩატარდა ხარვეზებით, შეცდომებით, თუმცა ეს არ უნდა იყოს პარლამენტში არშესვლის მიზეზი.

ჩემს აზრს ვამბობ, რომ „ქართული ოცნება" დღეისთვის არის საბჭოთა კავშირის 1990-იანი წლების ბოლო, როდესაც ფაქტობრივად, ქვეყნის მმართველობა ეკონომიკური პრობლემების გამო ჩამოიშალა. იყო პოლიტიკური საკითხებიც, მაგრამ ძირითადად ეკონომიკური იყო. ხალხის მოთხოვნა იქნება, რომ უნდა შეიქმნას ქვეყანაში კოალიციური მთავრობა და დაინიშნოს რიგგარეშე არჩევნები.

პარლამენტში ჩემი შესვლა ჩემთვის თეორიაა. ანუ იმგვარად არ არის, რომ ეს ჩემთვის პირველი იყო და ძალიან გამიხარდა პარლამენტში შესვლა. 2008 წლიდან საქართველოში ყველაზე მასშტაბური პროექტები განვახორციელე. ქვეყანაში დღეს რომ სავაჭრო ცენტრებია და ფაქტობრივად, 25 000 სამუშაო ადგილია, შემიძლია ვთქვა, რომ ეს პირადად ჩემი დამსახურებაა. ასევე, პირველი სავაჭრო ცენტრის მშენებლობა საქართველოში, ათეულობით ცნობილი ბრენდები, რაც ქვეყანაში დღეს ფუნქციონირებს, ჩემი დამსახურებაა. ეს იყო ჩემი პირველი პროექტი, რაც 2008 წლიდან განვახორციელე და რომელიც საბედნიეროდ, ახლაც მიმდინარეობს. ვფიქრობ, რომ ქვეყნის გადარჩენის ერთადერთი გზაა თავისუფალი ინდუსტრიული ზონების ყველა რეგიონში აშენება. ამას სჭირდება საკანონმდებლო ცვლილებები, იმიტომ, რომ დღეს არსებული საკანონმდებლო ბაზა ძალიან ცუდია. მეორე მთავარი პროექტი, რაც 2008 წელს მქონდა დაწყებული და რისი ინიციატორიც ვიყავი, ეს იყო თავისუფალი ინდუსტრიული ზონების შექმნის კონცეფცია. ეს პროექტი დაწყებული მქონდა. ჩემი შემოსვლის მთავარი მიზანი არის ის, რომ ეს თავისუფალი ინდუსტრიული ზონები, რომელიც 2008 წელს დავიწყე, დავასრულო და ქვეყანაში კიდევ შევქმნა დაახლოებით, 30 000 სამუშაო ადგილი. თუ ამას ვერ მივაღწევ და ის საკანონმდებლო ბაზა არ იქნება ქვეყანაში, სიტყვას გაძლევთ, დიდი სიამოვნებით დავტოვებ საქართველოს პარლამენტის წევრობას. ჩემთვის აპრიორი არ არის დეპუტატობა. ჩემი ცოდნა და სპეციალიზაცია, რაც მინდა საქართველოს მოვახმარო, ეს სამუშაო ადგილების არსებობისთვის საკანონმდებო ბაზის შექმნაა, რომელიც ეხება თავისუფალ ინდუსტრიულ ზონებს. ძალიან ბევრ ინვესტორს უნდა საქართველოში შემოსვლა, მაგრამ ერთადერთი შემაფერხებელი მიზეზი დღეს არსებული საკანონმდებლო ბაზაა", - განაცხადა მიქაძემ.

შეგახსენებთ, რომ "პატრიოტთა ალიანსის" ოთხი წევრი გელა მიქაძე, ფრიდონ ინჯია, ავთანდილ ენუქიძე და დავით ზილფიმიანი პარლამენტში უკვე შევიდა.