საქართველოში კორონავირუსის ახალმა შტამმა შემოაღწია - ჯანდაცვის სისტემა ახლა უფრო რთულ ვითარებაშია, თუმცა უცნობია რას გეგმავს ხელისუფლება ვირუსის ფართოდ გავრცელების შესაჩერებლად.

მედიკოსები შიშობენ, რომ შესაძლოა შემთხვევების ზრდა კლინიკების გადატვირთვას გამოიწვევს:

"რეალურად საშიშროება ის არის, რომ თუ მართლაც ასეთი სისწრაფით გავრცელდა და ვერ მოხდა მისი ლოკალიზაცია, კვლავ არ დაიწყოს შემთხვევების სწრაფი აღმავლობა და ისევ არ დავდგეთ იმ კრიზისის წინაშე, რომ გადაიტვირთოს საავადმყოფოები და ადამიანებს ვისაც დახმარება ჭირდება ვერ მოხვდნენ კლინიკებში" – ამბობს ინფექციონისტი მაია ბუწაშვილი

ქართველი მედიკოსების განცხადებით, ახალი შტამი ნებისმიერ ასაკობრივ კატეგორიას თანაბარი წარმატებით აინფიცირებს.

ექიმ ნანა გეგეჭკორის თქმით, თუ ახალი შტამის გავრცელება უკონტროლო გახდა, ჯანდაცვისთვისაც უკონტროლო სამართავი იქნება.

"ბევრი ადამიანი გახდება ავად, მაგრამ ყველა გახდება ავად მსუბუქი ფორმით, გაციების ფორმით და ბევრი ადამიანის მსუბუქი ფორმით ავად გახდომა, ძალიან მნიშნველოვანია ე.წ. პოპულაციური იმუნიტეტის შექმნისთვის, ამ ადამიანებს ექნებათ ანტისხეულები გამომუშავებული"– ამბობს იაშვილის კლინიკის სამედიცინო დირექტორი ივანე ჩხაიძე.

რაც შეეხება ხელისუფლებას, პირველ პირებს სამოქმედო გეგმაზე ამ დრომდე არ უსაუბრიათ.