პარლამენტმა "პატრიოტთა ალიანსის" სიის სამი წევრის: ფრიდონ ინჯიას, გელა მიქაძისა და დავით ზილფიმიანის სადეპუტატო უფლებამოსილება ცნო - მათ ადგილმონაცვლეობის პრინციპით ისარგებლებს და საკანონმდებლო ორგანოში პარტიის ლიდერის, ირმა ინაშვილის, გიორგი ლომიასა და გოჩა თევდორაძის ადგილები,რადგან მათ სადეპუტატო მანდატზე უარი თქვეს.

პარლამენტში პატრიოტთა ალიანსის საპარლამენტო სიის 4 წევრი იმყოფება, რადგან საპარლამენტო მანდატზე უარი არ უთქვამს ავთანდილ ენუქიძეს. უშუალოდ, დღეს, 5 იანვარს, რიგგარეშე სხდომის პლენარულ სესიას ინჯია, მიქაძე და ზილფიმიანი ესწრებიან.

ცენტრალური საარჩევნო კომისიის საიტზე გამოქვეყნებული ინფორმაციიდან ირკვევა, რომ პატრიოტთა ალიანსის საარჩევნო სიიდან მათი ნომრების ჩახსნის თაობაზე ცესკოსთვის არ ჰქონდათ მიმართული სწორედ გელა მიქაძეს, ფრიდონ ინჯიას და დავით ზილფიმიანს. სწორედ მათ შეეძლოთ, ადგილმონაცვლეობის პრინციპით ესარგებლათ და საკანონმდებლო ორგანოში ინაშვილის, თევდორაძისა და ლომიას ადგილი დაეკავებინათ.

ცნობისთვის, 31 ოქტომბრის არჩევნების ოფიციალური შედეგებით პარლამენტში მოხვედრილი 60 ოპოზიციონერი დეპუტატიდან მანდატზე ოფიციალურად უარი ამ დროისთვის 54-მა თქვა.