"ქართული ოცნების" წევრი , გია ვოლსკი, პუტინის გადაწყვეტილებას ეხამაურება , რომელმაც სპეციალურ წარმომადგენელს საქართველოსთან და საქართველოს ოკუპირებულ ტერიტორიებთან საზღვრის დადგენა დაავალა. ვოლსკი პუტინის მორიგ აგრესიას "ნაციონალურ მოძრაობას" აბრალებს და სრატეგიული ობიექტების მიყიდვაში, აგრესიის ხელშეწყობასა და ტერიტორიების გადაცემაში ადანაშაულებს.

"მე ძალიან მძიმე შეფასება მაქვს ამასთან დაკავშირებით. კიდევ ერთხელ შეგახსენებთ, რომ ის დათმობითი პოზიცია რუსეთისადმი, ჩვენი დასავლელი პარტნიორების ყოველდღიური შეხსენების იგნორირება, ის, რომ ხელი შეუწყვეს აგრესიას, ის, რომ გაუფორმეს ამ აგრესორებს ოკუპაციის მართებულობა ხელმოწერით საერთაშორისო დონეზე, ის, რომ მიყიდეს სტრატეგიული ობიექტები, დღეს კიდევ ეს პოლიტიკა თავს გვახსენებს თავისი ერთ-ერთი ყველაზე მძიმე სახით და მძიმე ასპექტით, ეს არის ე.წ ოკუპირებულ ტერიტორიებთან საზღვრების დადგენა", - თქვა ვოლსკიმ.

ვოლსკის შეფასებით, "ნაციონალური მოძრაობა" არის დანაშაულის ჩამდენი პოლიტიკური ძალა, რომელმაც ეს შედეგი მოგვცა".

კითხვაზე, არის თუ არა ეს რუსეთის მხრიდან მორიგი პროვოკაციული ქმედება, ვოლსკი პასუხობს, რომ "რა საკვირველია, პროვოკავია, უკანონობა და საერთაშორისო სამართლის ფეხქვეშ გათელვაა" , თუმცა კვლავ "ნაციონალურ მოძრაობას" დააბრალა ეს ყოველივე და განაცხადა, რომ "ამის საშუალება მისცა იმ პოლიტიკურმა ძალამ, რომელიც ყველაზე ხმამაღალ განცხადებებს აკეთებს".

"სწორედ ამის საშუალება მისცა იმ პოლიტიკურმა ძალამ, რომელიც ყველაზე ხმამაღალ განცხადებებს აკეთებს. ეს არის პრობლემა და პრობლემაა კიდევ ის, რომ ამ ძალას კიდევ ჰყავს მხარდამჭერები და თავისი რუპორი მედიასაშუალებები, აქედან გამომდინარე, კიდევ ქმნიან რაღაც აჟიოტაჟს, როდესაც საერთოდ გაჩუმებულები უნდა იყვნენ და ალბათ, უნდა ინანიებდნენ თავის ცოდვებს, რომელიც ჩაიდინეს ქართველი ხალხის და სახელმწიფოს წინაშე".

ცნობისთვის, გუშინ, 3 იანვარს რუსულ მედიაში გავრცელდა ინფორმაცია, რომ პუტინმა პეტრაკოვს საქართველოსთან და მის ოკუპირებულ ტერიტორიებთან საზღვრის დადგენა დაავალა.