საქართველოს საგარეო საქმეთა სამინიტრო ეხმაურება რუსულ მედიაში გავრცელებულ ინფორმაციას იმის თაობაზე, რომ პუტინმა პეტრაკოვს საქართველოს და მის ოკუპირებულ ტერიტორიებთან საზღვრის დადგენა დაავალა. უწყებაში აცხადებენ, რომ ვიდრე რუსეთი არ შეასრულებს 2008 წლის 12 აგვისტოს ცეცხლის შეწყვეტის შეთანხმებას და არ მოხდება ტერიტორიების დეოკუპაცია, მანამდე რუსეთის ფედერაციასა და საქართველოს შორის საზღვრის დელიმიტაცია-დემარკაციის საკითხი, დღის წესრიგში ვერ დადგება.

მათივე თქმით, ნებისმიერი მსგავსი ქმედება არის უკანონო და საერთაშორისო თანამეგობრობის მხრიდან იქნება შეფასებული, როგორც რუსეთის ფედერაციის მიერ სუვერენული სახელმწიფოს საზღვრების ძალისმიერი მეთოდებით შეცვლის მორიგი მცდელობა.

"რუსეთის ფედერაციასა და საქართველოს შორის საზღვრის დელიმიტაცია-დემარკაციის საკითხი, ბუნებრივია, დღის წესრიგში ვერ დადგება მანამდე, ვიდრე რუსეთის ფედერაციას ოკუპირებული აქვს საქართველოს რეგიონები. კერძოდ, აფხაზეთისა და ცხინვალის რეგიონი. მანამ, ვიდრე არ მოხდება რუსეთის ფედერაციის მხრიდან აღნიშნული ტერიტორიების დეოკუპაცია, ასევე 2008 წლის 12 აგვისტოს ცეცხლის შეწყვეტის შეთანხმების ხელშეკრულების სრულად შესრულება, ბუნებრივია, ნებისმიერი სახის ე.წ. შეთანხმება, მათ შორის ე.წ. საზღვართან დაკავშირებით, რომელიც შეიძლება, რუსეთის ფედერაციასა და ცხინვალისა და სოხუმის საოკუპაციო რეჟიმებს შორის დაიდოს, იქნება მოკლებული ყოველგვარ სამართლებრივ საფუძველს, იქნება უკანონო და საერთაშორისო თანამეგობრობის მხრიდან იქნება შეფერხებული, როგორც რუსეთის ფედერაციის მიერ სუვერენული სახელმწიფოს საზღვრების მორიგი ძალისმიერი მეთოდებით შეცვლის მცდელობა", - აცხადებენ საგარეო სამინისტროში.