საპარლამენტო უმრავლესობის ლიდერის, ირაკლი კობახიძის განცხადებას - "ყველაფრის იქით გადაგრეხვასთან" დაკავშირებით, "ნაციონალურ მოძრაობაში" გამოეხმაურნენ და ყოფილი პარლამენტის თავმჯდომარის ცინიკურ მუქარას არასერიოზული უწოდეს. როგორც ენმ-ს ლიდერმა ზალიკო უდუმაშვილმა განაცხადა,, სჯობს "ქართული ოცნება" მსგავსი განცხადებების ნაცვლად, პოლიტიკური კრიზისიდან გამოსვლის გზებზე დაფიქრდეს.

"ამ თემაზე და ზოგადად, "ქართული ოცნების" ცინიკურ განცხადებებზე კომენტარების კეთება უკვე არასერიოზულია. ვინ არის მძიმე მდგომარეობაში ძალიან კარგად ჩანს თუ შევხედავთ პარლამენტს, სადაც კოლმეურნეობის თავმჯდომარეების შეკრება უფროა, ვიდრე საკანონმდებლო ორგანო. ასე რომ ასეთი განცხადებების კეთებას, სჯობს დროულად მივიდნენ იმ გადაწყვეტილებამდე, რაც ქვეყანას პოლიტიკური ჩიხიდან გამოიყვანს. გასაგებია, რომ თავად არიან ჩიხში შესულნი და გამოსავალს ვერ პოულობენ, თუმცა მუდმივად ოპოზიციის თავდასხმას, სჯობს კრიზისზე იფიქრონ," - განაცხადა ზალიკო უდუმაშვილმა.

შეგახსენებთ, რომ დღეს მოქალაქეებმა ფინანსთა სამინისტროსგან მოკლე ტექსტური შეტყობინებები მიიღეს, რომელსაც თან ირაკლი კობახიძის განცხადების ბმული ერთვოდა, სადაც ყოფილი პარლამენტის თავმჯდომარე ენმ-სა და ევროპულ საქართველოს "ყველაფრის იქით გადაგრეხვით" ემუქრება. ფინანსთა სამინისტროში აღნიშნული მოკლე ტექსტური შეტყობინება ტექნიკური ხარვეზით ახსნეს და განაცხადეს, რომ შეტყობინება ყოველდღიური მედიამონოტორინგისთვის იყო განკუთვნილი. გზავნილები სხვადასხვა უწყების საჯარო მოხელეებმაც მიიღეს. მათივე განცხადებით, ფართო მასებს მსგავს ესემესებს არ უგზავნიან.