გამოუშვებენ თუ არა მოძალადეებს ციხიდან? - დიდი დაპირისპირება "ოცნებაში"

პოლიტიკა - 17:25, 30 Dec, 2020

1373

არავითარ შემთხვევაში, მე არ ვემხრობი ხუნდაძის ინიციატივას, უმრავლესობის მხარდაჭერას არ მიიღებს - ასე გამოეხმაურა განათლების კომიტეტის თავმჯდომარე და იუსტიციის ყოფილი მინისტრი თეა წულუკიანი ოცნების დეპუტატის დიმიტრი ხუნდაძის ინიციატივას, რომელიმაც ამნისტიის კანონპროექტის განხილვისას მოუწოდა თანაგუნდელებს, რომ სასჯელისგან ის პატიმრების გაეთავისუფლებინათ, რომლებიც ოჯახური ძალადობის მუხლით არიან დაკავებულნი.

ხუნდაძის თქმით, უმეტეს შემთხვევაში ასეთი დანაშაული ემოციურ ფონზე ხდება და თუ პატიმარი აცნობიერებს ან ინანიებს ჩადენილს, აუცილებელი არაა სასჯელის ბოლო წუთამდე იჯდეს ციხეში.

წულუკიანის მსგავსად, ხუნდაძის ინიციატივა სხვა დეპუტატებმაც მიუღებლად ჩათვალეს და ამნისტიის კანონპროექტში ოჯახური ძალადობისთვის ბრალდებულების გათავისუფლების ინიციატივა არ შეიტანეს.

პარლამენტმა ამნისტიის შესახებ კანონპროექტი პირველივე მოსმენით დაამტკიცა.

პარლამენტის ფრაქცია "ქართული ოცნების" თავმჯდომარე მამუკა მდინარაძე აცხადებს, რომ პოლიტიკა ძალადობის მიმართ ვერ იქნება ლოიალური.

"ამ განცხადებას ფრაქცია "ქართულ ოცნებაში" უმრავლესობის თანხმობა არ ექნება პირდაპირ გეუბნებით აქვე, გადაჭრით. პოლიტიკა ძალადობის მიმართ ვერ იქნება ლოიალური. შეგვიძლია მივუთითოთ სამართალდამცველებს, თუ მსგავსი შეცდომები ხდება პრაქტიკაში და ვიღაცის დაბრალების გამო შეიძლება ადამიანი ციხეში მოხვდეს, ეს ძალიან ცუდია და გასასწორებელი იქნება. ოჯახის ძალადობასთან დაკავშირებით ჩვენი მიმართულება არ შეიცვლება," - განაცხადა მამუკა მდინარაძემ.