მედიაში გავრცელებული ინფორმაციით, ალეკო ელისაშვილი "ოცნებასთან" ფარულ მოლაპარაკებებს მართავს. პარტია "მოქალაქეების" ლიდერი ფაქტს სოციალური ქსელით ეხმიანება და ვრცელ პოსტს აქვეყნებს.

მისი თქმით, "ოცნებასთან" ფარული მოლაპარაკებების საფუძველიც კი არ არსებობს.

ელისაშვილი მედიასა და ოპოზიციის წამომადგენლებს მოუწოდებს, რომ ლოგიკას გაყვნენ.

"ტელეკომპანია "მთავარმა" გაავრცელა ინფორმაცია თითქოს ჩვენი პარტია ფარულ მოლაპარაკებებს მართავს ქართულ ოცნებასთან რიგგარეშე არჩევნების სავარაუდო დანიშვნის პირობებთან დაკავშირებით. მინდა ნაწილობრივ დავადასტურო ეს ამბავი! წუხელ, აჭარის ტელევიზიასთან ჩართვის შემდეგ ოფისიდან წავედი სახლში. ეგრე 10 საათი იქნებოდა. სახლში ვიყავით მე, ჩემი ცოლი ირინა, შვილი სანდრო და სპანიელი რემბო. დაახოლებით ერთ საათში უაღრესად ფარულ და საიდუმლო ვითარებაში გვესტუმრა კარის მეზობელი და იმავდროულად ცოლისდა თამთა. საათზე მეტი ხნის განმავლობაში ჩვენ ვიხილავდით მიმდინარე პოლიტიკურ და საყოფაცხოვრებო საკითხებს. საახალწლო სამზადისსაც კი შევეხეთ საუბრის დროს. მალევე თამთა ბავშვების დასაძინებლად გადავიდა სახლში, რა თქმა უნდა ისევ უაღრესად ფარულ ვითარებაში...

ისე კი ძვირფასო მედიის და ოპოზიციის ნაწილის წარმომადგენლებო - ლოგიკას მაინც გაყევით: ხმამაღლა და მკაფიოდ გვაქვს ნათქვამი რომ თუ რიგგარეშე არჩევნები იქნება კარგია, არ ვართ წინააღმდეგები მაგრამ თუ არ დაინიშნება არც მაგაზე მოვიკლავთ თავებს. ჩვენთვის მთავარი არის საარჩევნო სისტემის ფუნდამენტური ცვლილება. ჰოდა, აქედან გამომდინარე ლოგიკა გეუბნებათ რომ ჩვენი და ქართული ოცნების ფარული მოლაპარაკებების საფუძველიც კი არ არსებობს. კი ვერ დაგიშლით არარსებული სკანდალის დეტალების დაზუსტებას, თქვენი საქმისა თქვენ იცით. უბრალოდ ამაოდ დაიღლებით და ეგაა", - წერს ელისაშვილი "Facebook"-ზე.

ცნობისთვის, ალეკო ელისაშვილის თანაპარტიელი, ლევან იოსელიანი, მას დეზინფორმაციას უწოდებს. მისი თქმით, კონსულტაციები მხოლოდ "გირჩთან" აქვთ, ისიც ტექნიკური ხასიათის.