პარლამენტის ადამიანის უფლებათა დაცვის კომიტეტის თავმჯდომარემ , მიხეილ სარჯველაძემ ამნისტიაზე საუბრისას განაცხადა , რომ იმ პირთა შორის, ვისაც დაგეგმილი ამნისტია შეეხება, დომინანტი ნარკოტიკების მომხმარებლები და ნარკოტიკულ დანაშაულისათვის მსჯავრდებულები არიან.

მისივე განმარტებით, ამნისტია პენიტენციურ დაწესებულებებში მყოფ 800-მდე თავისუფლებააღკვეთილ პირს შეეხება. ამ მსჯავრდებულთაგან კი, 680-მდე პირი სასჯელს “სისხლის სამართლის კოდექსის“ 260-ე მუხლით გათვალისწინებული ნარკოტიკული დანაშაულისათვის იხდის.

“წარმოდგენილი ინიციატივა შეეხება 260 მუხლის პირველ, მეორე და მესამე ნაწილებით გათვალისწინებულ დანაშაულებს, გარდა რეალიზაციისა. იყო ინიციატივა და დიდი თხოვნაა, რომ ამნისტია მეექვსე ნაწილით გათვალისწინებულ დანაშაულსაც შეეხოს. ამ შემთხვევაში გადაწყვეტილებების მიღება ძალიან რთულია. პირადად მგონია, რომ ამ მიმართულებით გარკვეული გაბედული ნაბიჯის გადადგმა შესაძლებელია. ეს შეიძლება, რადგან დღეს სახელმწიფო იმდენად ძლიერია, რომ საკუთარ თავს ასეთი ჰუმანური აქტის განხორციელების ფუფუნება მისცეს. ამ წუთას ამის შესაძლებლობა არსებობს“, - განაცხადა მიხეილ სარჯველაძემ ადამიანის უფლებათა დაცვის კომიტეტის სხდომაზე.

აქვე, ადამიანის უფლებათა დაცვის კომიტეტში “ამნისტიის შესახებ“ კანონის პროექტის პირველი მოსმენით განხილვა მიმდინარეობს.