ასეთ მდაბიო განცხადებებზე კომენტარს არ ვაკეთებ - ხაზარაძე ოქრუაშვილის კრიტიკაზე

პოლიტიკა - 17:14, 28 Dec, 2020

1122

"ლელოს" ლიდერი მამუკა ხაზარაძე ირაკლი ოქრუაშვილის კრიტიკას გამოეხმაურა და განაცხადა, რომ საქართველოში უნდა დასრულდეს ერთმანეთისთვის ტალახის სროლის ეტაპი. ხაზარაძემ ოქრუაშვილის მიერ სოციალურ ქსელში განთავსებულ პოსტს მდაბიო განცხადება უწოდა:
"ერთ-ერთი ვარიანტია, რომელიც იმსახურებს მსჯელობას და ლაპარაკია სრულ პროპორციულ არჩევნებზე. მთავარი საკითხი არის 2024 წლის არჩევნების გადმოწევა, მხედველობაში მაქვს სრულად პროპორციული, იმიტომ, რომ ჩვენ ყველამ კარგად დავინახეთ, რომ ეს მაჟორიტარული არჩევნები არის სრული გაუგებრობა, წარსული. მე ოქრუაშვილის პოსტი არ წამიკითხავს, მითხრეს და ასეთ მდაბიო განცხადებებზე კომენტარს არ ვაკეთებ. ვფიქრობ, რომ საქართველოში უნდა დამთავრდეს მსგავსი სიტყვების, ტალახის სროლის ეტაპი, ეს ჩემთვის ძალიან დაბალი დონეა, რომ ასე დაბლა დავეშვა და ვისაუბრო ანალოგიური ტექსტებით" - განაცხადა მამუკა ხაზარაძემ.

შეგახსენებთ, ხაზარაძის გუშინდელი განცხადების მიხედვით, ქვეყანაში პოლიტიკური კრიზისის განსამუხტად, საჭიროა ე.წ. სერბული მოდელის გამოყენება - აღნიშნული ფორმულირება ასახავს ევროკავშირში გაწევრიანების მსურველ სერბეთში პოლიტიკური კრიზისის დროს შეიქმნილ პოლიტიკურ მიმართულებას, როდესაც ოპოზიციასა და ხელისუფლებას შორის შედგა შეთანხმება - არჩევნები ოთხის ნაცვლად, 2 წელიწადში ჩატარებულიყო. ხაზარაძის აზრით, ვადამდელი არჩევნები 2022 წელს უნდა გაიმართოს და აქედან დაიწყოს 4 წლის ათვლა.
ამ განცხადებას ირაკლი ოქრუაშვილი სოციალურ ქსელში გამოეხმაურა და ძალიან ცინიკური პოსტი დაუწერა.