ეკონომიკის მინისტრი ნათია თურნავა ელექტროენერგიის ტარიფის მოსალოდნელ გაძვირებასთან დაკავშირებით აკეთებს კომენტარს და იმედს იტოვებს, რომ სემეკი ოპტიმალურ გამოსავალს მოძებნის. თურნავას განმარტებით, პანდემიის პერიოდში უამრავმა კომპანიამ გარკვეული ზარალი ნახა, რის გამოც მომსახურება გააძვირა:

„ჩვენ დარწმუნებულები ვართ, რომ სემეკი მიიღებს დაბალანსებულ, ოპტიმალურ გადაწყვეტილებას, რომელიც ერთი მხრივ მომხმარებლის უფლებებს დაიცავს და მეორე მხრივ, ენერგოკომპანიებსაც მისცემს საშუალებას, რომ ელეტროენერგია უსაფრთხოდ მიაწოდონ მოსახლეობას და კომერციულ აბონენტებს.

პანდემიის დროს ფინანსური კრიზისი ბევრ კომპანიას შეეხო, საზღვარგარეთაც და საქართველოშიც. რაც შეეხება ელექტროენერგიის ტარიფებს, კანონმდებლობის თანახმად, ტარიფების დადგენას ახორციელებს დამოუკიდებელი რეგულატორი, მარეგულირებელი კომისია - სემეკი, რომელიც თავისი მეთოდოლოგიით ხელმძღვანელობს. ამ ეტაპზე ჩვენ არ ჩავერევით მათ კომპეტენეციაში. დაველოდოთ მოვლენებს, ეს არის სემეკის პრეროგატივა და ის მიიღებს დაბალანსებულ გადაწყვეტილებას", - აღნიშნა ეკონომიკისა და მდგრადი განვითარების მინისტრმა.