ხელისუფლებამ პასუხისმგებლობა ბოლომდე უნდა გააცნობიეროს, მას ძალიან ფართო კომპრომისის სივრცე აქვს

ხელისუფლებამ პასუხისმგებლობა ბოლომდე უნდა გააცნობიეროს, მას ძალიან ფართო კომპრომისის სივრცე აქვს - დეკანოიძე

პოლიტიკა - 19:29, 27 Dec, 2020

1114

„ნაციონალური მოძრაობის“ წევრი ხატია დეკანოიძე ერთპარტიული პარლამენტის თავმჯდომარის არჩილ თალაკვაძის განცხადებას გამოეხმაურა და აღნიშნა, რომ თუ მნიშვნელოვან საკითხზე შეთანხმება არ შედგება, პარლამენტში ოპოზიციის შესვლა გამორიცხულია.

დეკანოიძის განმარტებით, არსებულ ვითარებაზე პასუხისმგებლობა ხელისუფლებას ეკისრება, რადგან მას კომპრომისისთვის მეტი სივრცე აქვს:

„ალბათ, ბატონი არჩილ თალაკვაძე საუბრობს იმას, რაც ძალიან უნდა ბიძინა ივანიშვილს და ყოველთვის ასე იყო. მინდა, ჩვენი პარტიის და ბლოკის სახელით დაგარწმუნოთ, ასევე თავს უფლებას მივცემ და მთელი ოპოზიციური სპექტრის სახელით ვიტყვი, რომელმაც უარი თქვა მანდატზე, არავითარ შემთხვევაში ჩვენი გადაწყვეტილება არ შეიცლება, თუ არ მოხდება ის მნიშვნელოვანი შეთანხმება, რომელიც წარდგენილი გვაქვს. ამიტომ, მთელი პასუხისმგებლობა არის ხელისუფლების მხარეს, პოლიტიკური კრიზისის განმუხტვისთვის და კომპრომისისთვის მათ უფრო მეტი სივრცე აქვთ. გარწმუნებთ, არავინ პარლამენტში შესვლას არ აპირებს. თუ 2-3 ადამიანი შევა, ვინც საუბრობდა, ეს არაფერს შეცვლის.

მნიშვნელოვანია, რომ ხელისუფლებამ პასუხისმგებლობა ბოლომდე გააცნობიეროს. მას ძალიან ფართო კომპრომისის სივრცე აქვს, მოვიდეს კეთილგონივრული წინადადებით, რადგან ამ ქვეყანაში არის უმძიმესი კრიზისი ეკონომიკური, ჯანდაცვის და პოლიტიკური თვალსაზრისით. ამიტომ, თუ ოდნავ მაინც კეთილგონივრულ ჭრილში მიუდგებიან, მნიშვნელოვანია ხელისუფლების მხრიდან დათმობა“, - განაცხადა დეკანოიძემ.

შეგახსენებთ, რომ პარლამენტის თავმჯდომარემ არჩილ თალაკვაძემ გნაცხადა, რომ ოპოზიცია მალე შევა პარლამენტში.