"დღეიდან ჩვენ გთავაზობთ, დავნერგოთ, მნიშვნელოვანი ცვლილებები მეტი დემოკრატიულობის, მეტი გახსნილობის და მეტი ჩართულობის მიმართულებით" - ასე მიმართა ერთიანი ნაციონალური მოძრობის ახლადარჩეულმა თავმჯდომარე ნიკა მელიამ ყრილობის დელეგატებს.

მელიამ იმ გეგმებზე ისაუბრა, რომლის განხორციელებასაც აპირებს

"1. ეს არის ინიციატივების მხარდაჭერა და განვითარება. ჩვენი ოფისები გახდება გარემო სადაც ნებისმიერ ადამიანს შეუძლია მოვიდეს იდეით, იმუშაოს მის განვითარებაზე, მიიღოს ჩვენი მხარდაჭერა.

ანალოგიურად, განახორციელოს იგივე ვირტუალურად - ჩვენს მიერ შექმნილ შესაბამის ონლაინ პლატფორმებზე.

2. წახალისებული და მხარდაჭერილი იქნება ნებისმიერი საინტერესო პროექტი თუ პროგრამა, რომელიც ხელს შეუწყობს ჩვენ ქვეყანაში დემოკრატიის, პოლიტიკური თანასწორობის, კანონის უზენაესობის და თავისუფალი ეკონომიკის განვითარებას.

3. ნაციონალური მოძრაობის ოფისები ჩამოყალიბდება არა პარტიული ბიუროკრატიის ნაწილად, არამედ მოქალაქეთა მხარდაჭერის ცენტრებად. ნებისმიერ ადამიანს, ვისაც დასჭირდება თანადგომა, პრობლემის მოგვარება, კონკრეტული საკითხის გარკვევა, ჩვენს ხელთ არსებულ ყველა რესურსს გამოვიყენებთ მათ დასახმარებლად.

4. და ჩემი აზრით ძალიან მნიშვნელოვანი - თქვენი ჩართულობის გაზრდის და გაძლიერების მიზნით ნაციონალური მოძრაობა გადადის ხალხის მიერ დაფინანსების საჯარო და მონაწილეობით მოდელზე, თითოეულ თქვენგანს, ვისაც სურვილი გაქვთ, შეგიძლიათ გახდეთ ნაციონალური მოძრაობის დელეგატი (წარმომადგენელი) სიმბოლური შენატანის გზით და ერთის მხრივ მონაწილეობა მიიღოთ პარტიის უშუალო მართვაში ჩვენს გადაწვეტილებებზე ხმის მიცემით, და მეორეს მხრივ, პროგრამების განხორციელებაში მონაწილეობის მიღების გზით.

ეს არის სრულიად სიმბოლური სვლა ახალი კულტურის დასანერგად, რომლისთვისაც, ჩვენი ღრმა რწმენით, მზადაა საქართველოს მოსახლეობა: დიახ, მათ უნდა უკარნახონ პოლიტიკოსებს და ჩვენ გავახმოვანოთ, მათ უნდა დაგვიკვეთონ და ჩვენ შევასრულოთ!

საქართველო ქართველ ხალხს ეკუთვნის და ქართველმა ხალხმა უნდა გადაწყვიტოს, რა სჭირდება საქართველოს!"- აღნიშნა მელიამ.