გურჯაანის მუნიციპალიტეტის მერი, არჩილ ხანდამაშვილი, შესაძლოა, თანამდებობიდან გადააყენონ.

ის ამ დროისთვის ერთთვიან შვებულებაშია გასული და აცხადებს, რომ სამსახურში ერთ თვეში დაბრუნდება , ოპოზიციაში - საპირისპიროს ირწმუნებიან, რომ უკან აღარ დაბრუნდება.

მერის გადაყენების თემა აქტუალური მას შემდეგ გახდა, რაც ის გურჯაანის მაჟორიტარ დეპუტატს, დავით სონღულაშვილს დაუპირისპირდა.

"შვებულებაში გავედი, იმდენი უქმე დღეები ემთხვევა და ისეთი პერიოდი ავირჩიე, რომ ოჯახისთვის მოვიცალო, შვილებთან ვიყო ცოტა ხნით მაინც და ნამდვილად ვაპირებ უკან გამოსვლას სამსახურში. თანამდებობის დატოვებას არ ვაპირებ, არასდროს ყოფილა მსგავსი დაპირისპირება, რომ მე თანამდებობა დამტოვებინა, ფიზიკური ხომ საერთოდ, სისულელეა", - ამბობს მერი, არჩილ ხანდამაშვილი "მთავარ არხთან".

"ერთიანი ნაციონალური" მოძრაობის წევრის, ლევან ბეჟშვილის თქმით, აქვთ ინფორმაცია, რომ მერმა შვებულებაზე განცხადება იმიტომ დაწერა, რადგან "სონღულაშვილის კლანის" მორჩილება არ სურს.

"ლელოში" აცხადებენ, რომ ქალაქის მერი "მინი ოლოგარქთან" დაპირისპირებას შეეწირა.

აქვე, არჩილ ხანდამაშვილი მერის თანამდებობას 2017 წლიდან იკავებს. მის სახელს რამდენიმე გახმაურებული ფაქტი უკავშირდება.