81 მომხრე და არც ერთი წინააღმდეგი - მე-10 მოწვევის ერთპარტიულმა პარლამენტმა მიიღო პირველი რეზოლუცია, რომელიც ქვეყნის საგარეო პოლიტიკას განსაზღვრავს.

16 პუნქტად გაიწერა ის მთავარი საგარეო პრიორიტეტები, რომლებზეც მომდევნო 4 წელი უმაღლესი საკანონმდებლო ორგანო იმუშავებს.

"საქართველოს საგარეო პოლიტიკის შესახებ" საქართველოს პარლამენტის რეზოლუციის პროექტი. ქართული საზოგადოებისთვის ევროპული და ევროატლანტიკური არჩევანი არის ისტორიული არჩევანი, რომელიც გამყარებულია საქართველოს კონსტიტუციით, შესაბამისად, ეს რეზოლუცია ეყრდნობა სწორედ, ქართველი ხალხის მიერ გამოხატულ არჩევანს და კონსტიტუციის 78-ე მუხლს, რომელიც ავალებს ხელისუფლების ყველა შტოს, რომ იმუშაონ საქართველოს ევროკავშირში და ნატოში გაწევრიანებისთვის" , - თქვა საგარეო ურთიერთობათა კომიტეტის თავმჯდომარემ, ნიკოლოზ სამხარაძემ.

დოკუმენტი საგარეო პოლიტიკის შესახებ მოიცავს ისეთ საკითხებს, როგორებიცაა ქვეყნის დეოკუპაცია, რუსეთიდან მომდინარე ჰიბრიდული ომის საფრთხეები, საერთაშორისო დავები რუსეთის წინააღმდეგ, ნატოსა და ევროკავშირში გაწევრიანება და ურთიერთობები პარტნიორ ქვეყნებთან.