პარლამენტის აპარატი ბოიკოტის რეჟიმში მყოფი ოპოზიციისთვის ხელფასის ჩარიცხვის მიზეზებს განმარტავს

პოლიტიკა - 16:56, 25 Dec, 2020

1140

საქართველოს პარლამენტის აპარატი სპეციალურ განცხადებას ავრცელებს და განმარტავს, თუ რატომ ჩაერიცხათ ბოიკოტის რეჟიმში მყოფ ოპოზიციის წარმომადგენლებს საპარლამენტო ხელფასი:

"გაცნობებთ, რომ პარლამენტის წევრის შრომის ანაზღაურების საკითხს არეგულირებს საქართველოს პარლამენტის რეგლამენტი, საქართველოს კანონი „საქართველოს პარლამენტის წევრის სტატუსის შესახებ" და საქართველოს კანონი„საჯარო დაწესებულებაში შრომის ანაზღაურების შესახებ" .
ასევე, გაცნობებთ, რომ მას შემდეგ, რაც მეათე მოწვევის პარლამენტმა წევრთა უფლებამოსილება სცნო, პარლამენტის აპარატმა დეპუტატებს ოფიციალური შეტყობინება გაუგზავნა. შეტყობინების თანახმად, პარლამენტის აპარატი, მათი კუთვნილი ხელფასის ჩარიცხვის განხორციელების მიზნით, ითხოვდა დეპუტატების საბანკო რეკვიზიტებს. ამას გარდა, დამატებითი კითხვების არსებობის შემთხვევაში, წერილში მითითებული იყო შესაბამისი საკონტაქტო პირიც. პარლამენტის წევრების მიერ საბანკო რეკვიზიტების არ წარმოდგენის შემთხვევაში, პარლამენტის აპარატი მოკლებული იქნებოდა შესაძლებლობას, განახორციელოს ხელფასის ჩარიცხვის ტრანზაქცია.
რაც შეეხება იმ პარლამენტის წევრებს, რომელთაც ჩაერიცხათ ხელფასი, გაცნობებთ, რომ რადგან ისინი ფლობდნენ დეპუტატის მანდატს მეცხრე მოწვევის პარლამენტშიც, მათი რეკვიზიტები უკვე დაფიქსირებული იყო შესაბამის სისტემაში და ხელფასის ჩარიცხვა მასზე დაყრდნობით, კანონის სრული დაცვით მოხდა.
ინფორმაციისთვის, ასევე გვსურს გაცნობოთ, რომ მათი სურვილის შემთხვევაში, არსებობს დეპუტატთა კუთვნილი ხელფასის უკან დაბრუნების მექანიზმი, ხოლო იმ შემთხვევაში, თუ პარლამენტის წევრებს საერთოდ არ სურთ შრომის ანაზღაურების მიღება, მაშინ მათ წერილით უნდა მიმართონ პარლამენტის აპარატის შესაბამის სტრუქტურულ ერთეულს" - ნათქვამია განცხადებაში.
შეგახსენებთ, რომ დღეს ოპოზიციის რამდენიმე წარმომადგენელმა განაცხადა, რომ მანდატებზე თქმის მიუხედავად, საპარლამენტო ხელფასი ჩაერიცხა. მათივე განმარტებით, ისინი აღნიშნული ხელფასის გამოყენებას არ აპირებენ.