"სტრატეგია აღმაშენებლის" ლიდერი , გიორგი ვაშაძე აცხადებს, რომ თუ ვინმე ფიქრობს, რომ რევოლუციის დაგეგმვა შეუძლია, ძალიან შემცდარა . მისი შეფასებით, ვინც რევოლუციაზე ფიქრობს ანბანიც კი არ იცის, როდის ხდება და რა პირობებში შეიძლება მოხდეს რევოლუცია.

ვაშაძემ ხაზგასმით აღნიშნა, რომ ოპოზიციას არ შეუძლია რევოლუციის მოწყობა და რევოლუციის წყარო ყოველთვის არის ქვეყნის ხელისუფლება.

„მე საერთოდ აბსურდი მგონია, რომ ვინმე რევოლუციას გეგმავდეს. ეს ვერ მოხდება. რევოლუცია ასე არ ხდება ქვეყანაში, რომ ვიღაცამ დაგეგმა რევოლუცია და მერე ამის რეალიზება მოახდინა ნაბიჯ-ნაბიჯ. ქვეყნებში რევოლუციები ხდება სპონტანურად და მერე შეიძლება რაღაც შეიცვალოს. ამიტომ, ცრუ დილემებს ნუ დავიყენებთ ჩვენ, რომ ვიღაც რევოლუციას გეგმავს. თუ ვინმე ფიქრობს, რომ რევოლუციის დაგეგმვა შეუძლია, ძალიან შემცდარა. მე ვფიქრობ, რომ ანბანიც კი არ იცის, როდის ხდება და რა პირობებში შეიძლება მოხდეს რევოლუცია. არც არავინ მომიყვეს, რომ 2003 წლის რევოლუცია ვინმეს დაგეგმილი იყო და იმიტომ განხორციელდა. ამ ცრუ დილემებს და ცრუ წარმოდგენებს ნუ შეიქმნის ნურავინ. ეს არის აბსურდი და ფარსი. ეს არის ცრუ საქმე. სისულელეა ამაზე ტვინის დაღლა და კონცენტრაცია. ტვინი უნდა იყოს გადართული საქმის კეთებაზე, სტრატეგიული ნაბიჯების სწორ გადადგმაზე, სამოქმედო გეგმის რეალიზებაზე. როგორც წესი, რევოლუციის მთავარი მომწყობი არის ხელისუფლება და არა ოპოზიცია. ოპოზიცია ვერ ახდენს რევოლუციას. თუ გინდათ დიდი საბჭოთა რევოლუციიდან დავიწყოთ ანალიზი, როგორ მოხდა რანაირად მოხდა. იქ ყირგიზეთზე საუბარი, რომ აუ იქ ასე მოხდა... არასწორია ეს. ასე არ ხდება. არც ის თქვას, ვინმემ, რომ უკრაინაში „მაიდანზე“ რომ მოხდა რევოლუცია, ეს დაგეგმილი იყო და ასე მოხდა. არ ხდება ესე. რევოლუციები ასე არ ხდება და ამ ცრუ დილემას ნურც საზოგადოებას ნუ დავუსახავთ და ნურც ხელისუფლებას ნუ მივცემთ ამ ცრუ დილემით მანიპულაციის შესაძლებლობებს“, - განაცხადა ვაშაძემ გადაცემაში "360 გრადუსი".