"ქართული ოცნება" აპირებს, ყველაზე დიდი ოპოზიცური პარტიებისთვის დაფინანსების შეწყვეტისა და რეგისტრაციიდან მოხსნის კანონპროექტის ვენეციის კომისიაში განსახილველად გადააგზავნოს. სწორედ ამ საკანომდებლო ინიციატივამ შეაშფოთა ევროპის სახალხო პარტია (EPP) და მმართველ გუნდს მოუწოდა "ოპონენტების შეზღუდვის ნაცვლად, დაუბრუნდეს დიალოგს და იპოვოს გამოსავალი".

"ოცნებაში" კი ირწმუნებიან, რომ მათი ინიცირებული კანონპროექტი დემოკრატიულია და ვენეციის კომისიის დასვკნას ელოდებიან.

"ეს გადაწყვეტილება არის კიდევ ერთი დასტური, იმისა, რომ ჩვენი ხელისუფლება და ჩვენი გუნდი მოქმედებს ევროპული დემოკრატიული პრინციპების გათვალისწინებით, რომ არავითარი კითხვის ნიშანი არ იყო ამ კანონპროექტთან დაკავშირებით, მიღებულ იქნა გადაწყვეტილება, რომ ვენეციის კომისიამ გააკეთოს ამაზე საკუთარი დასკვნა" – განაცხადა პარლამენტის საგარეო ურთიერთობათა კომიტეტის თავმჯდომარემ ნიკოლოზ სამხარაძემ.

"ჩვენ გავაკეთეთ ძალიან ცხადად განცხადება დღეს პარლამენტის სხდომაზე, ეს არის ინიციატივა, რომელზედაც კონსტულტაციების გავივლით საერთაშორისო პარტნიორებთანაც და შესაბამისად მივიღებთ გადაწყვეტილებას, მაგრამ ფაქტი არის ერთი, საჭიროა სამართლებრივი მექანიზმების შემუშავება რაც ქვეყანას დაიცავს მსგავსი მდგომარეობისგან" – აცხადებს პარლამენტის ევროპასთან ინტეგრაციის კომიტეტის თავმჯდომარე მაკა ბოჭორიშვილი.

ოცნების წარმომადგენელი ანრი ოხანაშვილი EPP–ს განცხადებაზე კომენტარს თავს არიდებს: "შეშფოთებებზე მერე ვილაპარაკოთ" - ამ რეპლიკით შემოიარგლა მხოლოდ იურიდიულ საკითხთა კომიტეტის თავმჯდომარე EPP–სთან დაკავშირებით დასმულ კითხვებზე.