ენუქიძის შესვლის შემთხვევაში "ოცნებას" ეყოლება არა 90, არამედ 91 დეპუტატი

ენუქიძის შესვლის შემთხვევაში "ოცნებას" ეყოლება არა 90, არამედ 91 დეპუტატი - ზურაბ ჯაფარიძე

პოლიტიკა - 16:42, 23 Dec, 2020

1212

"გირჩის" ლიდერი ზურაბ ჯაფარიძე "პატრიოტთა ალიანსის" წევრის ავთანდილ ენუქიძის მხრიდან მანდატის დატოვების ფაქტს ეხმაურება და აცხადებს, რომ არც გაუგია, ვინ არის ეს პიროვნება და ვერ დაიჯერებს, რომ იდეებით სავსე ადამიანია და სწორედ ამიტომ შედის პარლამენტში. ჯაფარიძის შეფასებით, ის ოცნებამ მოისყიდა:

"მე არ ვიცი, ვინ არის ავთანდილ ენუქიძე, ცხოვრებაში არ გამიგია, არ მსმენია. არ მჯერა, რომ უცებ ხვალ შეიძლება აღმოჩნდეს, რომ ავთანდილ ენუქიძე არის ცნობილი ქართველი პოლიტიკოსი, რომელსაც სავსე აქვს თავი იდეებით, როგორ უნდა შეცვალოს ეს ქვეყანა და რაღაც რეფორმების პაკეტით შევიდა პარლამენტში და ხვალიდანვე დაიწყებს კანონების ინიცირებას. ეს ადამიანი, ან იყიდეს, ან შეიტყუეს ამითი, ან ამ ადამიანს მთელი ცხოვრების ოცნება ჰქონდა, რომ რამენაირად პარლამენტში აღმოჩენილიყო. მესამე ვერსია, რომ მნიშვნელოვან ინიციატივებს დააყენებს, მე მაგის არ მჯერა. ჩათვალეთ, თუ ის შევიდა, იქნება ოცნების არა 90, არამედ 91 დეპუტატი. ეგ არის და ეგ", - განაცხადა ჯაფარიძემ.

"პატრიოტთა ალიანსის" სიის მე-4 ნომერმა ავთანდილ ენუქიძემ განაცხადა, რომ საარლამენტო მანდატზე უარს არ ამბობს და ჯერ არ გადაუწყვიტავს, როდის შევა პარლამენტში.

პატრიოტთა ალიანსს საპარლამენტო არჩევნებში 4 სადეპუტატო მანდატი ერგო. ირმა ინაშვილმა და პარტიული სიის კიდევ ორმა წევრმა მანდატის შეწყვეტის შესახებ საკანონმდებლო ორგანოს უკვე მიმართა.