მედიაც, არასამთავრობო ორგანიზაციებიც უნდა იყვნენ დაინტერესებულნი არა კანონში ხარვეზების ძიებით, არამედ პირბადის ტარების წესის დაცვით

მედიაც, არასამთავრობო ორგანიზაციებიც უნდა იყვნენ დაინტერესებულნი არა კანონში ხარვეზების ძიებით, არამედ პირბადის ტარების წესის დაცვით - ცქიტიშვილი

პოლიტიკა - 16:47, 22 Dec, 2020

1126

საკოორდინაციო საბჭოს დასრულების შემდეგ რეგიონული განვითარებისა და ინფრასტრუქტურის მინისტრობის კანდიდატის მაია ცქიტიშვილის მიმართ დასმულმა შეკითხვამ, ხომ არ არის წინააღმდეგობა არსებულ კანონმდებლობასა და ღია სივრცეში პირბადის გარეშე ყოფნისთვის მოქალაქეებს დაჯარიმებას შორის, ვიცე-პრემიერი გააღიზიანა. ცქიტიშვილმა ჟურნალისტებს უპასუხა, რომ მედიაც და საზოგადოებაც ინტერესდებოდეს პირბადის ტარების წესის შესრულოებით და არა რაიმე ხარვეზის ძებნით სხვადასხვა დადგენილებაში:

"იურიდიული მუხლების წიაღებში ნუ შევალთ, მაგრამ პირველი, ჩვენი მთავრობის დადგენილებით, დღეის მდგომარეობით, ჯანდაცვის კანონის ფარგლებში დადგენილი გვაქვს პირბადეების რეგულაცია, გვაქვს სრული უფლება იმისა, რომ გამოვიყენოთ საჯარიმო სანქციები, რომელსაც დღეის მდგომარეობით იყენებს შინაგან საქმეთა სამინისტრო, თუმცა რადგანაც ჩვენ 1-ლი იანვრიდან ვაახლებთ ამ კანონის მოქმედებას, შესაბამისად, უკვე ამ კანონში გაიწერება ეს სანქციაც.

არავითარ კაზუსთან არ გვაქვს საქმე და მეორე კომენტარსაც ვიტყვი, მედიაც, ჩვენი მოქალაქეებიც, არასამთავრობო ორგანიზაციებიც და ყველა, საქართველოში მცხოვრები ნებისმიერი მოქალაქე უნდა იყოს დაინტერესებული არა მთავრობის დადგენილებაში ან კანონში ხარვეზების ძიებით, არამედ იმით, რომ პირბადე ატაროს უკლებლივ ყველა მოქალაქემ" - განაცხადა ცქიტიშვილმა.