პანდემიით გამოწვეული ცვლილებები მსოფლიოში - საქართველოს პრეზიდენტმა ქართველ დიპლომატებს "ელჩების კონფერენცია 2020"-ის გახსნის ცერემონიაზე სიტყვით მიმართა.

კონფერენცია წელს კოვიდპანდემიის პირობებში ონლაინ რეჟიმში ტარდება და თავის გამოსვლის დიდი ნაწილი სალომე ზურაბიშვილმა სწორედ ამ საკითხს დაუმთო.

ზურაბიშვილის განცხადებით, პანდემიამ შეცვალა ურთიერთობები, დამოკიდებულება, გადააფასებინა ადამიანებს ღირებულებები და შეცვალა დიპლომატიაც და ის გაღარიბდა და უფრო მეტად ფორმალური გახდა:

“ჩვენმა ქვეყანამ ძალიან დიდი დარტყმა მიიღო იმ მხრივ, რომ პანდემია პირდაპირ შეებრძოლა ჩვენს ერთ-ერთ ღირებულებას - სტუმართმასპინძლობას. მაგრამ, ამასაც გადავლახავთ. სამაგიეროდ გვაჩვენა, რომ ჩვენი ზოგიერთი სხვა ღირებულება, არამხოლოდ ჩვენი, საკაცობრიო პრინციპები, არის ძალიან საჭირო პანდემიასთან ბრძოლაში, ეს არის - სოლიდარობა, აღმოვაჩინეთ რომ ქვეყანათაშორის სოლიდარობის გარეშე გადარჩენა შეუძლებელია. აღმოვაჩინეთ ასევე თანასწორობა და რომ ეს პრინციპი ვრცელდება ყველაფერზე. პანდემია ვრცელდება ყველაზე, იმის მიუხედავად თუ ვინ არის.

და ბოლოს, პანდემიამ შეცვალა თქვენთვის ყველაზე ახლო სფერო - დიპლომატია. პირდაპირი კონტაქტები, ურთიერთობები, რომელიც არსებობდა და იყო დიპლომატიის საფუძველი, შეიცვალა დისტანციური, სატელეფონო და სხვა საშუალებით ჩატარებულ კონფერენციებით. დისტანციამ, ისედაც ზოგჯერ ცოტა ფორმალური ურთიერთობები, კიდევ უფრო ფორმალიზებული გახადა. ერთი მხრივ გაღარიბდა დიპლომატია, დაკარგა მოქნილობა და თავისუფლება" , - განაცხადა ზურაბიშვილმა.