გობეჯიშვილის გარდაცვალების საქმე - ერთ-ერთი ბრალდებული "ოცნების" ლიდერების დაკითხვას ითხოვს

პოლიტიკა - 16:15, 21 Dec, 2020

783

საქალაქო სასამართლოში ისნის საოლქო კომისიის თავმჯდომარის, თედო გობეჯიშვილის, გარდაცვალების ფაქტზე კობალაძე-ხუსკივაძის სასამართლო პროცესი იმართება, სადაც მოსამართლე მტკიცებულებების დასაშვებობაზე იმსჯელებს.

ბრალდებულ აკაკი კობალაძის განცხადებით, პოლიტიკოსებმა პოლიციაზე ადრე იცოდნენ ვინ უნდა დაეჭირათ აღნიშნულ საქმეზე. მისი თქმით, საჭიროა რომ გამოიკითხონ "ოცნების" პოლიტიკური სპიკერატის წევრები, რომლებიც, აანონსებენ საქმეზე დაჭერებს:

"დაყენებული იქნება ჩვენ მიერ საკითხი, რომ გამოიკითხონ "ოცნების" პოლიტიკური სპიკერატის წევრები, რომლებიც, აანონსებენ საქმეზე დაჭერებს, იმაზე ადრე, ვიდრე ბრალდების მოწმეები მისცემენ ჩვენებას, გაირკვეს საიდან სად მიდიოდა საქმე, პოლიციიდან ატყობინებდნენ პოლიტიკურ სპიკერატს, თუ პოლიტიკოსები ატყობინებდნენ პოლიციას ვინ დაეჭირათ" , – განაცხადა კობალაძემ.

"ყველა ის ჩვენება, რომელიც არის ირიბი მოწმეების მიერ მიცემული მოვითხოვთ არ იქნეს დაშვებული, ასევე ჩხრეკა, რომელიც უნებართვოდ ჩატარდა ჩემსა და კობალაძის სახლში, მოვითხოვთ ცნონ უკანონოდ." , – აღნიშნა ბრალდებულმა აკაკი ხუსკივაძემ.

შეგახსენებთ, რომ ხუსკივაძე და კობალაძე 10000-10000 ლარიანი გირაოს სანაცვლოდ 10 დეკემბერს გაათავისუფლეს.