პარლამენტი "ამნისტიის შესახებ" კანონპროექტის განხილვას იწყებს

პოლიტიკა - 15:24, 21 Dec, 2020

775

"ამნისტიის შესახებ" კანონპროექტი დღეს ბიუროს სხდომაზე დარეგისტრირდა და პარლამენტი უკვე მის განხილვას იწყებს.

განათლების კომიტეტის თავმჯდომარე თეა წულუკიანი კი განხილვის პროცესში ჩართვის ინიციატივით გამოვიდა და განაცხადა, რომ პატიმრებს აქვთ მასშტაბური ამნისტიის მოლოდინი და არის კითხვის ნიშნები, თუ რატომ არ არის ეს ამნისტია ისეთივე მასშტაბური, როგორც ეს 2012 წელს მოხდა:

„საზოგადოებაში ავტომატურად მიმდინარეობს შედარება ამ ამნისტიის პროექტისა 2012 წლის ამნისტიასთან. მიუხედავად იმისა, რომ ეს არ არის დარგობრივად ჩვენი, განათლების კომიტეტის, კომპეტენცია, მოგვიწევს რომ თუნდაც, ჩემი სახით ამ პროცესში ჩავერთოთ. ჩვენ გვახსოვს, რომ პატიმრებში იყო ძალიან დიდი მოლოდინი ამ ამნისტიის. დაგვჭირდება კიდევ უფრო მკაფიო კომუნიკაცია, რაშიც მზად ვარ მეც ჩავერთო. არის კითხვის ნიშნები, რატომ არ არის ეს ამნისტია ისეთივე მასშტაბური, როგორიც იყო 2012 წლის. აქ პასუხი მარტივია. ჩვენ 2012 წელს ციხიდან ვუშვებდით ხალხს, რომელთა უმრავლესობა დამნაშავეც კი არ იყო. მაგრამ ეს ვერაფერს შველის იმ მოლოდინს, რომ ეს ამნისტია გაფართოვდეს. მსჯელობისას ალბათ ჩვენ დაგვჭირდება რომ დავსვათ კითხვა, ხომ არ მივცეთ შეღავათი ასევე იმ ადამიანებს, ვისაც აქვს გრძელვადიანი სასჯელი და არ დავრჩეთ იმ პროექტზე, რომელიც ახლა არის. ამ კითხვას საზოგადოება უკვე სვამს. არის ეს საბოლოო ვერსია თუ ოდნავ მაინც უნდა გაფართოვდეს. 7500 მსჯავრდებული და 2500 ბრლდებული ჰყავს ქვეყანას, რაც პატარა ქვეყნისთვის ბევრია. ამ ამნისტიის პროექტში გვაქვს ის, რაც 2012 წლის ამნსტიაში არ ყოფილა, ეს არის სისხლის სამართლის ჯარიმებზე ამნისტია. ასევე მადლობა იმისთვის, რომ პატიმრების ის სეგმენტი არ დაივიწყეთ, უვადო პატიმრების და არის ამ პროექტში ჩადებული", - განაცხადა წულუკიანმა.