ოპოზიცის ლიდერები ლეიბორისტული პარტიის ოფისში კონსულტაციებს მართავენ. გაერთიანებული ოპოზიციის ერთ-ერთი ლიდერი, ნიკა მელია ამბობს, რომ ქვეყანაში ხელახალი არჩევნები აუცილებლად იქნება. ნიკა მელიასვე თქმით, "დაიწყება მზადება სამოქალაქო პროტესტისთვის".

"სრული პასუხისმგებლობით ვაცხადებ, ახალი არჩევნები ქვეყანაში აუცილებლად ჩაინიშნება. ნებით ჩაინიშნება ეს თუ ძალდატანებით ჩანიშნავს ბიძინა ივანიშვილი ეს უკვე, ფაქტიურად, მნიშვნელობის მატარებელი აღარ არის. ფაქტია რომ ახალი არჩევნები იქნება. იმიტომ, რომ არ არსებობს ბუნებაში გამოსავალი გარდა ახალი არჩევნებისა, რომელიც დაძლევს ამ კრიზისს. ჩვენ იმ ფუფუნებას ვერ მივანიჭებთ ვერავის, რომ თქვან ჩვენ ჩავშალეთ მოლაპარაკებების პროცესი. ამიტომ მოლაპარაკებების პროცესი გაგრძელდება, ჩვენ იქ ვიქნებით წარმოდგენილი, მაგრამ პარალელურად სამოქალაქო პროტესტის მზადება დაიწყება, ერთი ძალიან მნიშვნელოვანი მოთხოვნის გარშემო, ეს არის ახალი არჩევნები", - ამბობს ნიკა მელია

"ევროპული საქართველოს" ერთერთი ლიდერის, გიგა ბოკერიას თქმით, ვადამდელი არჩევნები, რაც შეიძლება მალე უნდა ჩატარდეს.

მისივე თქმით, დღეს შეხვედრისას საუბარი იქნება კობახიძის განცხადებაზე, გრძელვადიან გეგმებზე და მოლაპარაკებებზეც.

"ეხლა დღის წესრიგში დგას, რომ ივანიშვილის რეჟიმი უნდა მოეგოს გონს, თვითონ ივანიშვილი უნდა მოეგოს გონს, იმიტომ, რომ მისი არარაობების და კლოუნების გარემოცვა რაფერს წყვეტს... ეს დგას დღის წესრიგში და ვადამდელი არჩევნები უნდა ჩატარდეს სწრაფად.კობახიძი განცხადებაზეც იქნება საუბარი, გრძელვადიან გეგმებზევ, მოლაპარაკებებზეც და ყველაფერზე" - განაცხადა გიგა ბოკერიმ.