ოცნების გამოცხადებული რეპრესიების ქრონიკა - კობახიძე პარტიის რეგისტრაციის გაუქმების წინაპირობას ასახელებს

პოლიტიკა - 14:21, 17 Dec, 2020

1030

"ქართული ოცნების" სპიკერმა მმართველ პარტიაში გამართულ ბრიფინგზე შიძლება ითქვას ოპოზიციის რეპრესიების ახალი გეგმა გააჟღერა - ირაკლი კობახიძე ამბობს, რომ იმ შემთხვევაში, თუ პოლიტიკური პარტიის ლიდერის რანგში, წინასაარჩევნო კამპანიაში მონაწილეობას მიიღებს პირი, რომელიც აქტიური საარჩევნო უფლების რეალიზაციისათვის კონსტიტუციით დადგენილ რომელიმე ცენზს არ აკმაყოფილებს, აღნიშნული გარემოება საკმარისი მიზეზი ხდება იმისთვის, რომ პარტიას რეგისტრაცია გააუქმდეს.
შესაბამისი კანონპროექტი "ოცნების" მიედრაა ინიცირებული და მომავალი კვირის ბოლომდე დამტკიცდება.

"2000-ლარიანი ჯარიმა, რომელსაც მოქმედი საარჩევნო კოდექსი ითვალისწინებს საარჩევნო აგიტაციაში კონსტიტუციის საწინააღმდეგო ჩართულობისთვის არ არის საკმარისი იმ ნეგატიური გავლენის გასანეიტრალებლად, რაც, შესაძლოა, აღნიშნულმა ფაქტმა იქონიოს საარჩევნო პროცესზე.

შესაბამისად, ინიცირებული კანონპროექტი საარჩევნო კოდექსში არსებული ხარვეზის გასწორებას და კონსტიტუციური მოთხოვნის სათანადო აღსრულებას ისახავს მიზნად. ღრმად გვწამს, რომ აღნიშნული კანონპროექტი, კონსტიტუციური მოთხოვნის აღსრულებასთან ერთად, წარმატებით უზრუნველყოფს ქართულ პოლიტიკაში პოლარიზაციის ხარისხის შემცირებასა და ჯანსაღი ოპოზიციური პოლიტიკური ძალების გაძლიერებას”, – განაცხადა ირაკლი კობახიძემ ბრიფინგზე.