პარლამენტის თავმჯდომარე, არჩილ თალაკვაძე, აფრიკის დასახლებაში განვითარებული მოვლენებს, სადაც თბილისის მერიამ მშენებლობების დემონტაჟი განახორციელა აფასებს და აცხადებს, რომ დედაქალაქის მერი "ორკესტრირებული შეტევის" მსხვერპლი გახდა.

„ჩვენ ვნახეთ კახა კალაძეზე ორკესტრირებული შეტევა, რომელიც ცალსახად იყო მართული პოლიტიკური პროდიუსერების, ოპოზიციის მიერ მართული მედიის და იმ ადამიანების მხრიდან, ვისაც აქვს სუბიექტური ინტერესები ამ პროცესში”, - განაცხადა თალაკვაძემ.

როგორც თალაკვაძემ აღნიშნა, კახა კალაძეს და მის ოჯახს საქველმოქმედო ფონდი აქვს, რომლითაც შეჭირვებულ ადამიანებს ეხმარებიან.

თალაკვაძემ პარლამენტში გამართულ ბრიფინგზე ის სამშენებლო პროექტები ჩამოთვალა, რომელიც მისივე თქმით კახა კალაძის მერობის შემდეგ განახლდა. საუბარია "ოლიმპიური ვარსკვლავის", "სვეტისა" და "ცენტრ პოინტის" შეჩერებულ მშენებლობებზე.

„სწორედ კახა კალაძის ხელმძღვანელობით მოხდა იმ პროექტების აღდგენა. შეგახსენებთ, ეს არის „ოლიმპიური ვარსკვლავი“, „სვეტის“ კომპლექსი, დაწყებულია მუშაობა „ცენტრ-პოინტზე“, სადაც ათასობით ოჯახს აღუდგა საკუთრების უფლება. ეს ადამიანები ბრუნდებიან ბინებში,რომელიც წლების განმავლობაში უიმედოდ იყო დაკარგული. მათ მშვენივრად იცოდნენ, რომ თბილისის მერს კახა კალაძიეს და მის ოჯახს წლებია აქვს საქველმოქმედო ფონდი, რომელიც ეხმარება სწორედ ისეთ შეჭირვებულ ადამიანებს, ვისი სურათითაც გუშინ ამ ადამიანებს არგუმენტები მოჰყავდათ. მათ მშვენივრად იცოდნენ, რომ თბილისში უკანონო და თვითნებური განაშენებიანების დაშვება დედაქალაქის განვითარების პერსპექტივას კლავს“ , - განაცხადა თალაკვაძემ.

ცნობისთვის, აფრიკის დასახლებაში, თბილისის მერიამ მშენებლობების დემონტაჟი განახორციელა, რასაც სამართალდამცავებსა და მოსახლეობას შორის დაპირისპირება მოჰყვა. დაპირისპირების შედეგად 8 ადამიანი დააკავეს, რომლებიც მოგვიანებით გაათავისუფლეს.