ჩემთვის მძიმე საყურებელი იყო - სერგეენკო აფრიკის დასახლებაში სახლების ნგრევაზე

პოლიტიკა - 16:11, 16 Dec, 2020

1039

პარლამენტის ვიცე-სპიკერის დავით სერგეენკოს თქმით, მისთვისაც მძიმე საყურებელი იყო გუშინ აფრიკის დასახლებაში საცხოვრებელი სახლების დემონტაჟი, რომელსაც მოსახლეობის პროტესტი და დაპირისპირება მოჰყვა. მისი შეფასებით, მომხდარი ფაქტი იძულებითი ნაბიჯები იყო:

„რა თქმა უნდა, ყოველთვის მძიმე საყურებელია კადრები, როდესაც ძალის გამოყენებით ხდება ნაგებობების დანგრევა, თუმცა ვფიქრობ, რომ ეს იყო იძულებითი ნაბიჯები. ალბათ ამას წინ უძღოდა მოლაპარაკებები, რომლებიც სავარაუდოდ, უშედეგოდ დამთავრდა და რამდენადაც ვადევნებდი თვალყურს, სავარაუდოდ, შენობებში, რომელთა დემონტაჟიც მოხდა, არ ცხოვრობდნენ ადამიანები, არ იყო ჯერ დასრულებული. რაც შეეხება იმას, რომ ერთ-ერთ ოჯახს დაეხმარა ქალაქის მერი, ასეთი პიროვნული დახმარება ყოველთვის მისასალმებელია, თუმცა ქალაქის მერმა ასევე განაცხადა, რომ ოჯახებს, რომლებსაც საცხოვრებელი არ აქვთ, მერია დაეხმარება. აღსრულება ყოველთვის მძიმეა და ჩემთვის მძიმე საყურებელი იყო ეს, თუმცა როგორც ჩანს სხვა გამოსავალი არ იყო დარჩენილი. მე გამიჭირდება, რომ ასეთი ქმედებები მოვიწონო, თუმცა ვფიქრობ, რომ ეს იყო იძულებით გადადგმული ნაბიჯი“ - განაცხადა სერგეენკომ.

შეგახსენებთ, რომ გუშინ თბილისის მერიამ აფრიკის დასახლებაში მძიმე ტექნიკა გაგზავნა, რათა დაუკანონებელ მიწაზე აშენებული სახლების დემონტაჟი მოეხდინა. ფაქტს მოსახლეობასა და სამათალდამცველებს შორის ფიზიკური დაპირისპირება მოჰყვა, რის შედეგადაც რამდენიმე ადამიანმა, მათ შორის ორსულმა ქალმა სხეულის დაზიანებები მიიღო.