წულუკიანის შეცვლილი რიტორიკა: ვაშაძის წასვლა ნაკარნახევია იმით, თუ რა აჯობებდა ქვეყნისთვის

პოლიტიკა - 12:07, 15 Dec, 2020

1083

გრიგოლ ვაშაძის "ნაციონალური მოძრაობიდან" წასვლას განათლების კომიტეტის თავმჯდომარე თეა წულუკიანი გამოეხმაურა და აღნიშნა, რომ მისი პარტიიდან წასვლა ქვეყნის ინტერესებიდან გამომდინარე მოხდა. როგორც ჩანს, იუსტიციის ყოფილმა მინისტრმა რიტორიკა შეცვალა და ამჯერად ვაშაძის ღირსებებს გაუსვა ხაზი:
"8 მარტის შეთანხმება სანამ იქნებოდა მიღწეული, შესაძლებლობა მქონდა მხოლოდ 2 საწყის რაუნდში მოლაპარაკებების პარტიის სხვა წარმომადგენლებთან ერთად მიმეღო მონაწილეობა. იქ გავიცანი პირველად ბატონი გრიგოლ ვაშაძე. ადრეც აღვნიშნე და ეხლაც ვიტყვი - იქ წარმოადგენილი ოპოზიციის წევრებიდან ბატონი გრიგოლი ყოველთვის იყო მწვავე, ყოველთვის იყო პრინციპული, მაგრამ მის ყოველ კრიტიკას, მწვავე კრიტიკას, "ქართული ოცნების" ქარ-ცეცხლში გატარებას ყოველთვის გასდევდა ხოლმე თან ის რაღაც, რაც იშვიათად დამინახავს სხვა ოპოზიცის წევრებში. იტყოდა ძალიან უსიამოვნოს ჩემი ყურებისთვის, მაგრამ ეს ყოვეთვის იყო ნათქვამი რაღაც ფორმით. ეს ყოველთვის იყო ნაკარნახევი თითქოს არა ვიწრო პარტიულით, არამედ უფრო იმითი, თუ რა ჯობია ქვეყნისთვის. რაც არ უნდა არ მომწონდეს მე ის, რაც არ უნდა ჩემთვის მიუღებელ პოლიტიკურ ძალას წარმოადგენდეს, ეს ნამდვილად ასე იყო" - განაცხადა წულუკიანმა.
შეგახსენებთ, რომ დღეს "ნაციონალური მოძრაობის" თავმჯდომარემ გრიგოლ ვაშაძემ სოციალურ ქსელში განცხადება გაავრცელა და თქვა, რომ პარტიიდან მიდის.