ქართველი პოლიტიკოსი როდესაც იბრძვის ქვეყნის ინტერესებისთვის, უნდა იყოს პროაქტიური ელჩთანაც და დიპლომატებთანაც

ქართველი პოლიტიკოსი როდესაც იბრძვის ქვეყნის ინტერესებისთვის, უნდა იყოს პროაქტიური ელჩთანაც და დიპლომატებთანაც - მარგველაშვილი

პოლიტიკა - 10:11, 15 Dec, 2020

950

საქართველოს მეოთხე პრეზიდენტმა გორგი მარგველაშვილმა ფორმულას ეთერში ხელისუფლებასა და ოპოზიციას შორის მოლაპარაკებებსა და ამ მოლაპარაკების შუამავალ ელჩებზე ისაუბრა. მისი განცხადებით, შეიძლება ელჩმა დღის წესრიგი დაგიწესოს, მაგრამ ეგ იმას არ ნიშნავს, რომ პოლიტიკოსმა ქვეყნის დემოკრატიის განვითარებისთვის არ იბრძოლოს:

"შენ ამ ქვეყნებთან მუშაობ როგორც პარტნიორი და არა როგორც მათი დღის წესრიგის აღმსრულებელი, იქნება ეს ელჩი, დიპლომატი თუ პოლიტიკოსი. ის პარტნიორია, მაგრამ შენ უნდა იყო პროაქტიური, მომთხოვნი და შენ უნდა ქმნიდე დღის წესრიგს. არ გვეგონოს რომ დღის წესრიგი მათ უნდა ააგონ, ჩვენ ვეუბნებით, რომ გვეჩქარება საქართველოში დემოკრატია - თუ თქვენ დღეს არ გცალიათ, შემიძლია გავიგო, მაგრამ მე გავჩერდე და დღეს დემოკრატიისთვის არ ვიბრძოლო, გამორიცხულია. ეს უნდა იყოს ამოსავალი პოზიცია.

რა თქმა უნდა ყოველთვის ურჩევნიათ, შენ არ ჩახვიდე და პრინციპულად არ აბრახუნო იქნება ეს ნატო-ს თუ ევროკავშირის კარი, თვითონ დაგიწესებენ დღის წესრიგს, მაგრამ ქართველი პოლიტიკოსი როდესაც იბრძვის ქვეყნის ინტერესებისთვის, უნდა იყოს პროაქტიური ელჩთანაც, დიპლომატებთანაც, სხვა ქვეყნის პრეზიდენტებთანაც და პრემიერმინისტრებთანაც. მე მივესალმები მათ ჩართულობას, მაგრამ დღის წესრიგს ქმნის ქართველი პოლიტიკოსი. საქართველოში დემოკრატია მოაქვს ქართველ პოლიტიკოსს. ნაჩუქარი თავისუფლება მალე იკარგება, ამიტომ ჩვენ თვითონ უნდა მოვიპოვოთ ეს ყველაფერი"

შეგახსენებთ, რომ მოლაპარაკების მეხუთე რაუნდი ჯერ კიდევ წინ არის, რომელზეც გადაწყდება, მიაღწევენ თუ არა შეთანხმებას ოპოზიციური ერთობა და სახელისუფლებო გუნდი.