შეჯერებული მესიჯბოქსებია, ჩვეულებრივი მოცემულობაა, თითოეული ჩვენი გადადგმული ნაბიჯი განსაზღვრულია - ოცნება ნაცვლიშვილი-კობახიძის მიმოწერას განმარტავს

პოლიტიკა - 16:41, 14 Dec, 2020

959

სახელისუფლებო გუნდი დღეს გავრცელებულ მიმოწერას ეხმაურება, რომელიც ლაშა ნაცვლიშვილსა და ირაკლი კობახიძე შორის "მთავარის" გადამღებმა ჯგუფმა დააფიქსირა.

"ოცნების" წევრის ირაკლი ზარქუას თქმით, გუნდის ყველა ნაბიჯი წინასწარ გაწერილია, ხოლო საბურთალოს მაჟორიტარი დეპუტატი სახელისუფლებო გუნდიდან დავით სერგეენკო აცხადებს, რომ ნაცვლიშვილისგან შეჯერებულ მესიჯბოქსებს იღებს:

"ნაცვლიშვილი არის ჩვენი გუნდის წევრი, გვეხმარება პიარის საკითხებში, ეს თქვენთვის სიახლეა? გვარამიამ იცის ზეპირად ეს ყველაფერი. მესიჯბოქსი ეს არის რასაც წერთ, შეჯერებული შეთანხმებული და ჩვეულებრივი მოცემულობაა, თითოეული ჩვენი გადადგმული ნაბიჯი რაც არის, ყველა არის განსაზღვრული, გაწერილი, დაწერილი" , - აცხადებს ირაკლი ზარქუა.

ერთპარტიული პარლამენტის საბურთლოს მაჟორიტარი დეპუტატი დავით სერგეენკოც ამბობს, რომ ნაცვლიშვილისგნ "შეჯერებულ მესიჯბოქსებს" იღებს, ხოლო "ოცნებას" წინასაარჩევნოდ და საპარლამენტოდ ფეისბუქზე ახალ–ახალი ჯგუფები აქვს.

"შეჯერებული მესიჯბოქსებია, იყო რამოდენიმე ჯგუფი, ადრე ვიყავი "სამთავრობო ჯგუფის" წევრი, შემდგომ "წინასაარჩევნო პარტიული", ახლა უკვე "საპარლამენტო", შედარების საშუალება არ მაქვს, ერთი და იგივე მოდის თუ არა, მაგრამ ამ ჯგუფში მიდის მსჯელობა მესიჯებზე." – აღნიშნავს სერგეენკო.

მიმოწერას გამოეხმაურა თავად საპარლამენტო უმრავლესობის ლიდერი კობახიძეც, რომელმაც განმარტა, რომ საუბარი იყო "საერთაშორისო გამჭირვალობისგან" ინფორმაციის გამოთხოვის გზებზე – რა შეიძლებოდა ეცადათ კობახიძეს და ნაცვლიშვილს იმ შემთხვევაში, თუ ეკა გიგაურის ორგანიზაცია ინფორმაციის გაცემაზე უარს იტყოდა.