"ოცნებაზე" მომუშავე სკოლის დირექტორებს მათივე ხელისუფლებამ უმტყუნა - რა მოხდა გორში არჩევებიდან ერთი თვის თავზე?

პოლიტიკა - 14:16, 14 Dec, 2020

934

"ოცნებაზე" მომუშავე სკოლის დირექტორებს მათივე ხელისუფლებამ უმტყუნა და არჩევნებიდან ერთი თვის თავზე გორის მუნიციპალიტეტების სასწავლო დაწესებულებების ნაწილს ხელმძღვანელობა შეუცვალა.

ხიდისთავის, ერგნეთის, ბოშურის, კარალეთის, ფხვენისისა და სკრის საჯარო სკოლების აწ უკვე ყოფილი დირექტორებისთვის გაუგებარია, რატომ მოხდა მათი გათავისუფლება, რადგან არჩევნებზე სახელისუფლებო პარტიის კოორდინატორები იყვნენ.

"ყოველგვარი განმარტების და საფუძვლის გარეშე მოხდა ისე, რომ არ გადამიყვანეს მოვალეობის შემსრულებლად. ვსარგებლობ უდიდესი სიყვარულით და პატივისცემით თემში, სასკოლო საზოგადოებაში, მოსწავლეებში, პირველ რიგში. რატომ არ მოხდა მოვალეობის შემსრულებლად გადაყვანა - რა კრიტერიუმებით იხელმძღვანელეს და რატომ მიიღეს ასეთი გადაწყვეტილება?", - განაცხადა ხიდისთავის სკოლის დირექტორმა.

ოპოზიცია გორში არსებულ კლანურ მმართველობაზე საუბრობს და აღნიშნავს, რომ გათავისუფლებული დირექტორების ადგილებს ხოჯევანიშვილების კლანის ნათესავები დაიკავებენ. ადგილობრივი მოსახლეობაც არ მალავს აღნიშნულ ფაქტს და ჟურნალისტებთან საუბარში აცხადებს, რომ გორის, კასპის, ქარელისა და ხაშურის მუნიციპალიეტებში სახელმწიფო რწმუნებულის გიორგი ხოჯევანიშვილის ნათესავები მალე შეცვლიან სკოლის დირექტორებს:

"დაიწყო რეპრესიები არა მხოლოდ სკოლის დირექტორების, სხვა საჯარო მოხელეებსაც მიადგებიან. საფუძვლიანი ეჭვი გვაქვს, რომ სკოლის დირექტორების თანამდებობაზე შეიძლება ვიხილოთ ადამიანები, რომლებსაც უმაღლესი განათლების დიპლომიც არ აქვთ. არ გაგვიჭირდება მოძებნა, რომ იქ აღმოვაჩინოთ გიორგი ხოჯევანიშვილის ახლო ნათესავები, მეგობრები, ყველაფრის მკადრებლები და ხელის მომწერები სკოლებში", - აღნიშნა ერთ-ერთმა ადგილობრივმა.