ღია მუქარა მოლაპარაკებების პარალელურად - ოპოზიციას მეხუთე რაუნდზე პოზიტიური მოლოდინი არ აქვს

პოლიტიკა - 13:49, 14 Dec, 2020

869

მიუხედავად იმისა, რომ მეათე მოწვევის ერთპარტიული პარლამენტის პირველი სხდომა უკვე გაიმართა, ოპოზიციასა და ხელისუფლებას შორის მოლაპარაკების მეხუთე რაუნდი ჯერ კიდევ წინაა, თუმცა, ჯერ-ჯერობით უცნობია, როდის გაიმართება ის.

როგორც ჩანს, ივანიშვილის გუნდს უკან დახევა არ სურს, უფრო მეტიც - რამდენიმე დღის წინ კობახიძემ ღიად განაცხადა კიდეც, რომ კარგი იქნება, თუ პარლამენტში "ნაციონალური მოძრაობა" და ევროპული საქართველო არ შევლენ.

ხელისუფლება ყველაფერს აკეთებს იმისთვის, რომ ოპოზიციის ყველაზე ძლიერი გუნდი პოლიტიკური გზიდან ჩამოიშოროს, სწორედ ამიტომ, ის ყველაზე რადიკალურ ნაბიჯებზე მიდის - ამას მოწმობს ის მუქარები, რომლებიც კობახიძემ "ნაციონალური მოძრაობის" მისამართით არა ერთხელ გააჟღერა.

ოპოზიცია არც ამჯერად აპირებს წამოყენებული წინადადებების უკან წაღებას, თუმცა, ხელისუფლების ოპონენტებს იმედი არ აქვთ, რომ მეხუთე რაუნდი შედეგს გამოიღებს:

"პოზიტიური მოლოდინები ამ მოლაპარაკებებისგან არ მაქვს მაშინ, როცა პარალელურ რეჟიმში ე.წ. მოლაპარაკებები მიმდინარეობდა, კობახიძე ღიად ემუქრება ოპოზიციურ სპექტრს და "ნაციონალურ მოძრაობას" რეგისტრაციის ჩახსნით. ასევე, სხვა პარტიებს ეუბნება, თუ შემოხვალთ, დაფინანსებას მიიღებთ და თუ არ შემოხვალთ, არ მიიღებთ", - განაცხადა ენმ-ს წევრმა ხატია დეკანოიძემ.

ოპოზიციიდან მხოლოდ "მოქალაქეების" ლიდერს ალეკო ელისაშვილს აქვს იმედი, რომ მოლაპარაკება პოზიტიურად დასრულდება, შესაბამისად, ის მეხუთე რაუნდზე გარკეულ შეთანხმებასაც ელოდება:

"აუცილებლად წავალ ამ რაუნდზე. ღიად გვაქვს ნათქვამი და სწორედ ამის გამო ვართ შეტევის ობიექტები, რომ ჩვენთვის ყველაზე მთავარია შეთანხმება. არა უსასრულოდ და გეგმის გარეშე ქუჩაში დგომა, არამედ, შეთანხმება იმიტომ, რომ ჩვენ რასაც ვითხოვთ, ის გვაქვს მიტანილი და თითქმის ყველა საკითხში უკან იხევს "ქართული ოცნება". ძალიან მნიშვნელოვანია, რომ ეს შეთანხმება შედგეს და ჩვენ მხოლოდ შეთანხმების შემდეგ ვაპირებთ პარლამენტში შესვლას", - განაცხადა ელისაშვილმა.