ევროპული საქართველოს ერთ-ერთი ლიდერი, სერგი კაპანაძე, საქართველოში გერმანიის ელჩის განცხადებას ეხმაურება.

კაპანაძის თქმით, გერმანიის ელჩი არ უნდა ამაყობდეს ამ განცხადებით, რადგან მასში ჩანს უპატივცემულობა საქართველოს დღევანდელობისა და წარსულის მიმართ.

კაპანაძემ აღნიშნა, რომ ის ვერანაირ ტრაგედიას ვერ ხედავს იმ აზრთა სხვადასხვაობაში, რაც მათ და პარტნიორი ქვეყნების წარმომადგენლებს შორის არის.

კაპანაძემ ასევე აღნიშნა, რომ არ არის სწორი ღია შეტევები დიპლომატიურ კორპუსზე.

„მიმაჩნია, რომ გერმანიის ელჩი ამ თავისი განცხადებით, დიპლომატიური ენით რომ ვთქვათ, მაინც და მაინც არ უნდა ამაყობდეს, რადგან ეს არის განცხადება, რომელშიც როგორც მინიმუმ ჩანს უპატივცემულობა როგორც საქართველოს დღევანდელი რეალობის, ისე წარსულის მიმართ და ეს არ არის ის რასაც ელჩები აკეთებენ ხოლმე.

მიუხედავად ამისა, ჩვენთვის ელჩების პოზიციები ყოველთვის არის ყურადსაღები და მნიშვნელოვანი, მაგრამ კარგად უნდა გვესმოდეს ყველას, რომ ჩვენ, პოლიტიკური პარტიები, ევროპული საქართველო მათ შორის და პირველ როგში, არასოდეს არ ვხელმძღვანელობთ ელჩების ინსტრუქციებით და პოზიციებით, ჩვენ გამოვხატავთ ჩვენი ხალხის ინტერესებს და ვხელმძღვანელობთ ხალხის ინტერესებით და იმით, რაც ჩვენ მიგვაჩნია რომ არის სწორი და კარგი ჩვენი ქვეყნის დღევანდელობისათვის და მომავლისათვის.

ამრიგად, თუ ჩვენ შორის, ჩვენ და ჩვენ პარტნიორების წარმომადგენლებს შორის საქართველოში იქნება ხოლმე აზრთა სხვადასხვაობები, მე ამაში ვერანაირ ტრაგედიას ვერ ვხედავ და არ მიმაჩნია სწორად ღია შეტევები დიპლომატიურ კორპუსზე.“ - განაცხადა კაპანაძემ.