კობახიძის უმძიმესი ბრალდება ოპოზოციას: "გაყიდეს გარეჯი და მოკლეს საოლქო კომისიის თავმჯდომარე"

პოლიტიკა - 13:36, 14 Dec, 2020

1372

ირაკლი კობახიძე აცხადებს, რომ ოპოზიციამ ხელისუფლებასთან მოლაპარაკების მაგიდაზე პატიმრების თემა თავად მოიტანა, ხოლო ახლა, "თემის შემოტანას ფასილიტატორ ელჩებს აბრალებს".

ქართული ოცნების აღმასრულებელი მდივანი ამბობს, რომ ოპოზიციის საქციელი სამარცხვინოა, რადგან ამ პოლიტიკურმა ძალებმა "გაყიდეს გარეჯი და მოკლეს საოლქო კომისიის თავმჯდომარე".

"მართლა მსოფლიო მასშტაბით გვჭრის ოპოზიცია თავს, როდესაც საუბრობენ, რომ ტყვეებით ვაჭრობენ ჩვენი მთავარი სტრატეგიული პარტნიორი ქვეყნების ელჩები, ეს არის თავის მოჭრა. თითონ მოიტანეს ეს საკითხი მოლაპარაკებაზე და მერე ელჩებს დააბრალეს, რომ მათი შემოტანილი იყო. როდესაც გაყიდული გაქვს დავით გარეჯი და როდესაც შენ მოკალი საოლქო კომისიის თავმჯდომარე, ვგულისხმობ რადიკალურ ოპოზიციას როგორც ასეთს, მერე ეს საკითხი მოგაქვს მოლაპარაკებების მაგიდაზე, ეს თავის მოჭრაა", - აცხადებს კობახიძე.

მისი თქმით, ასეთი ე.წ. რადიკალური ოპოზიციის ადგილი საქართველოს პარლამენტში არ არის.

ოპოზიციაში ამბობენ, რომ ივანიშვილის გუნდი მმართველი გუნდი ტყვეებით ვაჭრობს. ხელისუფლების ოპონენტების თქმით, დაკავებულები მხოლოდ იმ შემთხვევაში გათავისუფლდებიან საპატიმროებიდან თუ პოლიტიკური პარტიები პარლამენტში შევლენ.