"მთავარი არხის" გენერალური დირექტორი ნიკა გვარამია აცხადებს, რომ ის დასავლეთს ემსახურება, მაგრამ პერიოდულად იღებს დანას ზურგში დასავლეთის ქვეყნების ზოგი წარმომადგენლისგან. ამ წარმომადგენლებს შორის ერთ-ერთი, საქართველოში აშშ-ის ელჩი კელი დეგნანია.

"საქართველოს მოსახლეობის უმრავლესობა მიიჩნევს, რომ ეს პარლამენტი არის უკანონო. აი, კელი დეგნანი იქ რომ იჯდა, ჩემი აზრით, სრულიად მძიმე შეცდომის დამშვები კელი დეგნანი, მისმა სამშობლომ, რომლის ხაზსაც უნდა ატარებდეს აქ, მიულოცა ქართულ ოცნებას ხელისუფლებაში მოსვლა? არა! აბა ვისი მანდატით იჯდა კელი დეგნანი იქ? მე არავის დაცვა არ მჭირდება, არავის არ სჭირდება ნაჩუქარი თავისუფლება, ჩვენ გვჭირდება ელჩებისგან სიმართლე პოლიტიკურ დევნაზე და პოლიტპატიმრებზე. მე არ მახსოვს ამ ორი ელჩისგან ჩემი და ჩემი ოჯახის დევნაზე საჯარო განცხადებები," - ამბობს ნიკა გვარამია. აქვე გეტყვით რომ გვარამია მეორე ელჩში საქართველოში ევროკავშირის წარმომადგენლობის ელჩს კარლ ჰარცელს გულისხმობს.

ნიკა გვარამიამ აშშ-ის ელჩის მოადგილესთან მისი საუბრის აქამდე უცნობი დეტალები გაასაჯაროვა, სადაც დიპლომატმა გიორგი რურუა "შეიარაღებული ბანდის მეთაურად" მოიხსენია.

"დიახ, მე პერიდულად ვიღებ ზურგში დანას, იმის მიუხედავად, რომ ვემსახურები დასავლეთს. დანას ვიღებ ზურგში, მაგალითად, სტრასბურგის სასამართლოსგან, ვიღებ დანას იგივე კელი დეგნანისგან, რომლის მოადგილე გიორგი რურუასთან დაკავშირებით მეუბნება, რომ მისი პატიმრობა კი არ არის სირცხვილი, არამედ ის, რომ რურუა ჩემი ტვ-ს ერთერთი დამფუძნებელია, რადგან ის, თურმე, არის “შეიარაღებული ბანდის მეთაური” - ამ დეტალებზე ღიად ახლა პირველად ვსაუბრობ", - თქვა ნიკა გვარამიამ "მთავარი არხის" ეთერში, გადაცემაში "მთავარი შაბათს".