შესაძლოა, მათი საქმიანობა კითხვის ნიშნის ქვეშ დადგეს - როგორ აფასებენ არასამთავრობო ორგანიზაციები ISFED-ის შესწორებულ შედეგებს?

პოლიტიკა - 15:31, 12 Dec, 2020

1348

არასამთავრობო ორგანიზაციის "სამართლიანი არჩევნების" (ISFED) პარალელური დათვლის ახალ მონაცემებსა და შიდა აუდიტის მიერ გამოვლენილ ხარვეზზე არასამთავრობო ორგანიზაციებს სხვადასხვა კითხვები უჩნდებათ. მათთვის ბუნდოვანია, აუდიტის საბოლოო დასკვნის გასაჯაროვებამდე რატომ მიუწვდებოდათ ხელი მონაცემებისთვის მმართველ გუნდს.

NGO-ების განცხადებით, აქამდე "სამართლიანი არჩევნების" საქმიანობა სანდო იყო, თუმცა, ახლა შესაძლოა ეს მონაცემები, გარკვეული გარემოებებიდან გამომდინარე, ეჭვქვეშ დადგეს:

"მე მესმის, რომ ბევრი რამე შეცვალა ამ განცხადებამ, მაგრამ თუკი სიმართლე ასეთია, მისი დამალვა იქნებოდა უფრო ცუდი. განსხვავებით ხელისუფლებისგან, არასამთავრობო ორგანიზაციებს შეგვწევს ძალა საკუთარ თავში ვიპოვოთ შესაძლებლობა თუკი აღმოჩნდება, რომ რაიმე შეგვეშალა", - განაცხადა "საქართველოს დემოკრატიული ინიციატივის" თავმჯდომარემ გიორგი მშვენიერაძემ.

"არსებობს სერიოზული ნდობა ორგანიზაციის შედეგების მიმართ - ამიტომაც მნიშვნელოვანია, ყველა კითხვას გაეცეს პასუხი. ჩემთვის კითხვის ნიშანია როგორ ხდება მსგავსი კონფიდენციალური ინფორმაციის გასაჯაროვება და როგორ მიდის მმართველი პარტიის აღმასრულებელ მდივანამდე", - აღნიშნა უჩა ნანუაშვილმა.

"ბევრ კითხვის ნიშანს აჩენს 1,5 თვის შემდეგ შედეგების გადახედვა. აღმოჩნდა ისე, რომ შესაძლოა ISFED-ის საქმიანობა და მათი პარალელური დათვლა დადგეს კითხვის ნიშნის ქვეშ. ეს ცუდად აისახება სამოქალაქო სექტორის სანდოობაზე", - განაცხადა პლატფორმა 20/20-ის თავმჯდომარემ ვასო ურუშაძემ.

შეგახსენებთ, რომ არასამთავრობო ორგანიზამიამ „სამართლიანი არჩევნები“ (ISFED) 2020 წლის 31 ოქტომბრის არჩევნების პარალელური დათვლის შედეგები გამოაქვეყნა და განაცხადა, რომ საარჩევნო სუბიექტის მიერ მიღებული ხმების გამოსათვლელ ფრმულაში ხარვეზები დაფიქსირდა. გასწორების შემდეგ, საარჩევნო სუბიექტების მიერ მიღებული ხმების პროცენტული რაოდენობა უმნიშვნელოდ შეიცვალა. აღნიშნული სხვაობა გავლენას არ ახდენს არცერთი საარჩევნო სუბიექტის მიერ მიღებული მანდატების რაოდენობაზე.„სამართლიანი არჩევნების“ (ISFED) 2020 წლის 31 ოქტომბრის არჩევნების დღის საბოლოო შედეგების დაზუსტებული ინფორმაციით, "ქართულ ოცნებას" ხმების 47.6% აქვს, ხოლო ნაციონალურ მოძრაობას - 27.4%.