ძალიან მძიმე იყო ამ განცხადების გამოქვეყნება - ISFED-ის აღმასრულებელი დირექტორი ხმების პარალელური დათვლის შედეგები შეცვლაზე

პოლიტიკა - 13:20, 12 Dec, 2020

3876

არასამთავრობო ორგანიზაცია "სამართლიანი არჩევნებისა და დემოკრატიის საერთაშორისო საზოგადოებას" (ISFED) აღმასრულებელი დირექტორი, ელენე ნიჟარაძე ორგანიზაციის მიერ გუშინ გამოქვეყნებულ პარალელური დათვლის ჩასწორებულ შედეგებს სოციალურ ქსელში ეხმაურება და წერს, რომ ორგანიზაციის წევრები შეეცადნენ, მაღალი სტანდარტები დაეცვათ და თვალი არ დაეხუჭათ "რაღაცაზე". ნიჟარაძემ აღნიშნა, რომ მსგავსი მძიმე გამოწვევა 2012 წლის შემდეგ ორგანიზაციას არ ჰქონია:

"ძალიან მძიმე იყო ამ განცხადების გამოქვეყნება. ISFED-ისთვის, როგორც ორგანიზაციისთვის და მისი თითოეული თანამშრომლისთვის ეხლა ყველაზე მძიმე და სტრესული პერიოდია. მე რაც ორგანიზაციაში ვარ 2012 წლიდან ასეთი მძიმე გამოწვევა ორგანიზაციას არ ქონია. მადლობა მინდა ვუთხრა თითოეულ თანამშრომელს მხნეობისა და გამძლეობისთვის

პირადად ჩემი და ორგანიზაციის სახელით უღრმესი მადლობა ყველა იმ ადამიანს, რომელმაც სტატუსით თუ სხვა სახით მხარდაჭერა გამოხატა და გვერდში გვიდგას

ძალიან ვაფასებთ და ყველაზე მეტად ეხლა გვჭირდება ეს მხარდაჭერა.

ვიცი, რომ ბევრისთვის შოკისმომგვრელი იყო ეს განცხადება. ჩვენ ყველაზე კარგად გვესმის ეს მდგომარეობა. თუმცა, ეს არის რეალობა, რაც არ უნდა მძიმე იყოს. სამწუხაროდ, გვიწევს ხოლმე ასეთ მძიმე ფაქტებთან შეჯახება ცხოვრებაში და ამ დროს, ეტყობა, ყველაზე მნიშვნელოვანია, რომ ეს რეალობა მივიღოთ და როგორღაც გავუმკლავდეთ. ძალია მაღალი სტანდარტია, მაგრამ შევეცადეთ ეს მაღალი სტანდარტი დაგვეცვა და თვალი არ დაგვეხუჭა რაღაცაზე.

დარწმუნებული ვარ ბევრი კითხვები იქნება. შეგიძლიათ დამირეკოთ, მომწეროთ პირადში და შევეცდები ყველას გიპასუხოთ. ყველას ეხება ეს, როგორც მეგობრებს, ასევე ჟურნალისტებს. მოკლედ, არ მოგერიდოთ და შემაწუხეთ. ამ წუთას ბრიფინგი დაგეგმილი არ მაქვს, თუმცა შეიძლება დღის განმავლობაში ჩავნიშნოთ და ამასაც ყველას შეგატყობიებთ.

კიდევ ერთხელ ყველას დიდი მადლობა მხარდაჭერისთვის!" - წერს ნიჟარაძე სოციალური ქსელის საკუთარ გვერდზე.

შეგახსენებთ, რომ გუშინ ISFED-მა გაკეთა განცხადება, სადაც ეწერა, რომ ხმების პარალელური დათვლის დროს საარჩევნო სუბიექტების მიერ მიღებული ხმების გამოსათვლელ ფორმულაში ხარვეზი გამოვლინდა - საარჩევნო სუბიექტების მიერ მიღებულ ხმებთან ერთად, დათვლილი იქნა ბათილი ბიულეტენებიც, რისი გასწორების შედეგადაც საარჩევნო სუბიექტების მიერ მიღებული ხმების პროცენტული რაოდენობა უმნიშვნელოდ შეიცვალა.