„რესპუბლიკური პარტიის“ ერთ-ერთმა ლიდერმა ხათუნა სამნიძემ განაცხადა, რომ თუ „ნაციონალურ მოძრაობა - გაერთიანებულ ოპოზიციას“ პარლამენტი მანდატების გაუქმებასთან დაკავშირებით განცხადებას დაუკმაყოფილებს, მისი პარტია მანდატებს ხელისუფლებასთან მოლაპარაკების პროცესის მიმდინარეობის მიუხედავად დათმობს.

სხვა შემთხვევაში „რესპუბლიკური პარტია“ მოლაპარაკებების შედეგებს დაელოდება და საპარლამენტო მანდატების დათმობასთან დაკავშირებით გადაწყვეტილებას ამის მიხედვით მიიღებს.

„იმ შემთხვევაში თუ შემდგარ შეთანხმებას არ ეთანხმება ბლოკი, არ ვეთანხმებით ჩვენც, თუ ეთანხმება ბლოკი, ვეთანხმებით - ჩვენც. ანუ მოლაპარაკებებს ველოდებით ჩვენც და ისინიც, მაგრამ ჩვენ მანამდე მანდატის დატოვების შესახებ განცხადება არ შეგვაქვს. 17 დეკემბერს, როდესაც „ნაციონალური მოძრაობა“ აპირებს პარლამენტისთვის სადეპუტატო მანდატის გაუქმების შესახებ განცხადებით მიმართვას, ჩვენ იმაზე ვიქნებით დამოკიდებულები, სად ვიქნებით მოლაპარაკების პროცესში. თუ მოლაპარაკებები მანამდე ჩაიშალა, ჩვენ „ნაციონალურ მოძრაობასთან“ ერთად შეგვაქვს განცხადება, თუ მოლაპარაკებები გაგრძელდა, ჩვენ ველოდებით, რომ დასრულდეს. მაგრამ იმ პირობებში, როდესაც 17 დეკემბერს „ნაციონალურ მოძრაობას“ შეტანილი აქვს განცხადებები და მაგალითად, 19 დეკემბერს გავიგეთ, რომ პარლამენტი წყვეტს მათ სადეპუტატო უფლებამოსილებას, მაშინ ჩვენ აღარ ველოდებით მოლაპარაკებებს და დაუყოვნებლივ მოხდება ჩვენი განცხადების პარლამენტში შეტანაც. ანუ მე ჩემს პირობას ვასრულებ და მიუხედავად იმისა, რომ ველოდებოდი მოლაპარაკებების პროცესს, რადგან ჩემს ბლოკს, გადაწყდა, რომ არ აქვს მანდატი პარლამენტში, იგივე უნდა მოხდეს ჩემს მანდატებზეც. ის, რომ „ნაციონალურ მოძრაობასთან ერთად არ შეგვაქვს განცხადებები, ამის აზრი არის მოლაპარაკებების მნიშვნელობაზე ხაზგასმა. ალბათ, რესპუბლიკურ პარტიას ცოტა უფრო მეტი ოპტიმიზმი აქვს ამ მოლაპარაკებებზე, ვიდრე სხვა პარტიებს“, - განაცხადა ხათუნა სამნიძემ გადაცემა "რეზიუმეში".