რამ დაღალა პრეზიდენტი? - "ოცნების" დეპუტატების განმარტებები

პოლიტიკა - 18:48, 11 Dec, 2020

1057

"ქართული ოცნების" დეპუტატი , ლადო კახაძე ეხმაურება სალომე ზურაბიშვილის განცხადებას. მისი თქმით, ჩვენი ქვეყანა 30 წელია იბრძვის, რამაც დაღალა პრეზიდენტი.
"კუნთს აქვს თვისება, რომ დაიღალოს და ამუშავდეს, ეს არის მისი თვისება, რესურსი გამოიყენოს. პრეზიდენტის განცხადება, ალბათ, გულისხმობდა იმას, რომ ჩვენი ქვეყანა 30 წელიწადია იბრძვის, იღწვის დემოკრატიის გზაზე, მიდის ევროკავშირის გზაზე.გარკვეულწილად, ზოგჯერ არის წინააღმდეგობრივი ურთიერთობა არასწორად მოფიქრალი ოპოზიციის მხრიდან, რამაც შეიძლება გამოიწვიოს გარკვეულად კუნთის გადაძაბვა” - ამბობს კახაძე. გიორგი კახიანს მიაჩნია, რომ პრეზიდენტი ამით პოლიტიკურ პროცესებს გამოეხმაურა:

"საუბარი იყო პრეზიდენტის გამოსვლაში, რომ პოლიტიკური პროცესების ასეთი სცენარებით განვითარება ქვეყნისთვის მომგებიანი და სასურველი არ არის", - ამბობს "ქართული ოცნების" წევრი, გიორგი კახიანი.

სოზარ სუბარის აზრით, საზოგადოება ოპოზიციამ დაღალა:

"პრეზიდენტი არ ვიცი, მაგრამ ქვეყანა დაიღალა იმითი, როცა პოლიტიკოსებს ხმას აძლევენ და ისინი, ნაცვლად იმისა, რომ თავიანთი მოვალეობა შეასრულონ და პარლამენტში შემოვიდნენ, ქუჩაში ცდილობენ აქციების მოწყობას და თანაც, წარუმატებლად - აქციებსაც ვერ აკეთებენ", - ამბობს სოზარ სუბარი.

ცნობისთვის, სალომე ზურაბიშვილმა პარლამენტში სიტყვით გამოსვლის დროს 2 წუთში 4-ჯერ თქვა - "დავიღალეთ".