"მანდატებზე უარის ართქმა პარლამენტში შესვლის ტოლფასია"

"მანდატებზე უარის ართქმა პარლამენტში შესვლის ტოლფასია" - გიორგი კანდელაკი

პოლიტიკა - 18:12, 11 Dec, 2020

899

"ევროპული საქართველოს" ერთ-ერთი ლიდერი, გიორგი კანდელაკი აცხადებს, რომ მანდატებზე უარის ართქმა იურიდიულად პარლამენტში შესვლის ტოლფასია,

მისი თქმით, მოლაპარაკებებში და საერთაშორისო ფრონტზე ოპოზიციის მთავარი და მძლავრი ბერკეტი ოპოზიციის ერთიანობაა. ამის შესახებ ის სოციალურ ქსელში წერს.

"რა შუაშია მანდატების დათმობა არდათმობა მოლაპარაკებების გაგრძელებასთან? ვინც მანდატს დათმობს მოლაპარაკებს ვერ გააგრძელებს? რა სისულელეა! სწორედ მანდატების დათმობა ქმნის იმ ახალ რეალობას, რის გამოც წნეხი ქართულ ოცნებაზე გაასკეცდება და რის გამოც საქართველოს საკითხებში მეტი პოლიტიკური ფიგურა ჩაერთვება ცივილიზებული სამყაროდან და შედეგიც სწორედ ამ გზით დადგება და არა პირიქით. მანდატებზე უარის ართქმა იურიდიულად პარლამენტში შესვლის ტოლფასია და მოლაპარაკებებში მთლიანად ოპოზიციის პოზიციებს ასუსტებს. ეს ორჯერ ორი ოთხია და ვინც სხვაგვარად ამბობს, უბრალოდ იტყუება", — წერს კანდელაკი.

შეგახსენებთ, დღეს, 11 დეკემბერს პარლამენტში მე-10 მოწვევის სხდომა ჩატარდა, რომელშიც მხოლოდ ქართულმა ოცნებამ მიიღო მონაწილეობას. სხდომაზე ასევე იყვნენ მიწვეული პრეზიდენტი, პატრიარქი და დიპლომატები. პატრიარქის ნაცვლად, სხდომას მისი მოსაყდრე, შიო მუჯირი დაესწრო.

აქვე გეტყვით, რომ სხდომის პარალელურად, მოსწავლე ახალგაზრდობის სასახლის ეზოში შეკრებილმა ოპოზიციის ნაწილმა მანდატებზე უარი თქვა და ხელი მოაწერა საერთო მემორანდუმს ბოიკოტის შესახებ.