პარლამენტში მარტო დარჩენილი "ქართული ოცნება" პარლამენტში უკვე შეიკრიბა. "ოცენების" აღმასრულებელი მდივანი , ირაკლი კობახიძე აცხადებს, რომ "იწყება ახალი ოთხწლიანი პოლიტიკური ციკლი".

მისი თქმით, "ოცნებაში" იმედოვნებენ, რომ უახლოეს დღეებში "ოპოზიციის დიდი ნაწილი" მე-10 მოწვევის პარლამენტს შეუერთდება.

"დღეს არის ძალიან მნიშვნელოვანი დღე, დღეს შედგება პარლამენტის მე-10 მოწვევის პირველი სხდომა და იწყება ახალი ოთხწლიანი პოლიტიკური ციკლი. ეს არის ძალიან მნიშვნელოვანი დღე და ჩვენ დარწმუნებულები ვართ, რომ უახლოეს დღეებში ოპოზიციის დიდი ნაწილი შემოუერთდება საპარლამენტო მუშაობას. მნიშნველოვანია ის, რომ საბოლოო ჯამში გაივლოს ზღვარი ჯანსაღ და არაჯანსაღ ოპოზიციურ პარტიებს შორის, არაჯანსაღი პოლიტიკური პარტიების ადგილი საქართველოს პარლამენტში და ქართულ პოლიტიკაში არ არის. ჯანსაღ ოპოზიციურ პოლიტიკურ პარტიებს უნდა მიეცეს იმის შანსი, რომ მაქსიმალურად ჩაერთონ საპარლამენტო მუშაობაში და პოლიტიკურ ცხოვრებაში", - ამბობს ირაკლი კობახიძე

შეგახსენებთ, პარლამენტის შენობაში უკვე იმყოფებიან პრეზიდენტი, მმართველი პარტიის დეპუტატები, ასევე, იქ უკვე მივიდნენ დიპლომატიური კორპუსის წარმომადგენლები. პარლამენტის შენობაში მივიდა ასევე პატრიარქის თანამოსაყდრე მეუფე შიო. პარლამენტის გარეთ კი, სამოქალაქო აქტივისტების პროტესტი მიმდინარეობს.