ჟურნალისტის კითხვაზე, დააზიანებს თუ არა ელისაშვილის განცხადებები დანარჩენი ოპოზიცური პარტიების ერთობას, ევროპული საქართველოს ერთ-ერთი ლიდერი, სერგი კაპანაძე პასუხობს, რომ დანარჩენი პარტიების პოზიცია ცნობილია და ისინი აგრძელებენ ბრძოლას იმ მოთხოვნებისათვის, რომლებიც აქამდე ჰქონდა წაყენებული ოპოზიციას.

კაპანაძემ აღნიშნა, რომ თუ რომელიმე პოლიტიკოსი ან პოლიტიკური ძალა გადაწყვეტს, რომ საერთო მოთხოვნების გვერდის ავლით შევიდეს პარლამენშტი, ისინი გადაიხდიან იმ ფასს, რაც საზოგადოებას აქვს დაწესებული ამ პროცესზე.

კაპანაძის განცხადებით, ორი პოლიტიკოსის შესვლა პარლამენტში არ იქნება ამ ინსტიტუტისთვის ლეგიტიმაციის მინიჭება და ეს მხოლოდ ივანიშვილის თამაშის გაგრძელება იქნება პარლამენშტი.

„დანარჩენი პარტიების პოზიცია ცნობილია, ჩვენ ვაგრძელებთ ბრძოლად იმ მოთხოვნებისათვის, რომლებიც აქამდე გვაქვს წაყენებული და თუ რომელიმე ადამიანი, ცალკე აღებული, ან რომელიმე პარტია გადაწყვეტს, რომ ამ საერთო მოთხოვნების გვერდზე ავლით შევიდეს პარლამენტში რაღაცა სხვა რამის გამო, ისინი ფასს, რომელიც ამასთან არის დაკავშირებული, რასაც საზოგადოება აწესებს პროცესზე, იმას გადაიხდიან.

ძალიან ნათელია საზოგადოების პოზიცია, რომ არჩევნები გაყალბდა და ოპოზიციურმა პარტიებმა არ უნდა გაამართლონ გაყალბებული არჩევნები და თუ ელისაშვილი აპირებს, რომ ეს გააკეთოს, ვერავინ ვერავის ვერ დააკავებს, მაგრამ მიგვაჩნია, რომ ეს არის ძალიან დიდი შეცდომა.

ერთი ადამიანი, რომელიც პარლამენტში ივანიშვილის თამაშს ითამაშებს, არ იქნება ეს ლეგიტიმაციის მიცემა და არავისთვის არ იქნება ეს ლეგიტიმური პარლამენტი, მიუხედავად იმისა, თუ ერთი კონკრეტული, თუ ორი ადამიანი რას გადაწყვეტს და გადაწყვეტს, რომ ივანიშვილის თამაში გააგრძელოს პარლამენტში.“ - განაცხადა კაპანაძემ.