“შევუწყვეტთ დეპუტატობას, პარტიები ვერ მიიღებენ დაფინანსებას“ - “ოცნების“ გადათქმული პირობა და მუქარა ოპოზიციას

პოლიტიკა - 15:06, 09 Dec, 2020

1063

"ქართული ოცნების" აღმასრულებელმა მდივანმა ირაკლი კობახიძემ სპეციალურ ბრიფინგზე ოპოზიციის ბოიკოტს კიდევ ერთხელ გამოეხმაურა და განაცხადა, რომ პარტიები, რომლებიც პარლამენტში არ შევლენ, სახელმწიფო დაფინანსებას ვერ მიიღებენ. მისი თქმით, საპარლამენტო უმრავლესობა მანდატებს შეუწყვეტს ყველა იმ დეპუტატს, რომელიც განცხადებით მიმართავს შესაბამის საკანონმდებლო ორგანოს:

„ჩვენს პარტიაში დღეს შედგა თათბირი პარტიის ლიდერების მონაწილეობით და მივიღეთ გადაწყვეტილება, რომ საპარლამენტო უმრავლესობა საპარლამენტო მანდატებს მათ მიერ განცხადების საფუძველზე შეუწყვეტს ყველა იმ დეპუტატს, რომელიც არ ან ვერ შეეწინააღმდეგება რადიკალი ლიდერების ამბოხის სცენარს და პარლამენტს წარუდგენს შესაბამის განცხადებას. გარდა ამისა, სახელმწიფო დაფინანსებას და სხვა შესაბამის პრივილეგიებს ვერ მიიღებენ პარტიები, რომლებიც პარლამენტში არ იქნებიან წარმოდგენილები“, - განაცხადა კობახიძემ.

კობახიძის დღეს გაკეთებული განცხადება ეწინააღმდეგება გუშინ მის მიერვე გაკეთებულ კომენტარს. კობახიძე გუუშინ ირწმუნებოდა, რომ ოპოზიციური პარტიების წარმომადგენლებს სადეპუტატო უფლებამოსილებას არ შეუწყვეტდნენ და დროს დაუტოვებდნენ იმისათვის, რომ "პარლამენტში მოგვიანებით შესულიყვნენ".