ბინძური თავდასხმის ობიექტი გავხდით, შეთანხმების გარეშე არსად შესვლას არ ვაპირებთ - ვაშაძე გვარამიას ტყუილის გავრცელებაში ადანაშაულებს

პოლიტიკა - 16:07, 08 Dec, 2020

866

გიორგი ვაშაძე გავრცელებულ ინფორმაციას მისი პარლამენტში შესვლის თაობაზე ჟურნალისტებთან ეხმაურება და აცხადებს, რომ "სტრატეგია აღმაშენებელი" შეთანხმების გარეშე პარლამენტში არ შევა. მისივე მტკიცებით, პარტია ბინძული თავდასხმის ობიექტი გახდა:
"სტარტეგია აღმაშენებელი" შეთანხმების გარეშე არსად შესვლას არ აპირებს. სამწუხაროდ, ბინძური თავდასხმის ობიექტი გავხდით, ისევე, როგორც წინასაარჩევნო პერიოდში არაერთხელ. სწორედ იმ ძალებმა, რომლებიც დღეს ოპოზიციურ ერთობაზე საუბრობენ - მათ შორის ბატონი ნიკა გვარამიას მხარდაჭერილმა ძალებმა - დაარღვიეს საერთო ოპოზიციური შეთანხმებები, მისი უშუალო მონაწილეობით დამიყენეს კანდიდატი ისნის რაიონში და ჩაშალეს ის ძალიან დიდი პროცესი, რომელსაც გამარჯვება უნდა მოეტანა ქართველი ხალხისთვის. რაც შეეხება ჩემს ამოცანებს - პირდაპირ გეუბნებით, რომ ის 30%, რომელმაც არჩევნებზე ხმა არც ნაცებს და არც ქოცებს არ მისცა, გავაერთიანოთ, რათა მოჯადოებული წრიდან გამოვიდეთ. არ ვაპირებ სხვის რიტორიკასა და ბინძურ ქმედებებზე აყოლას. ყველას ვეუბნები - თავი შეიკავეთ ამ თავდასხმებისგან. ჩემი და თქვენი გზები, როგორც ჩანს, განსხვავდება. მე მინდა ივანიშვილი მოვაშთო, თქვენ გინდათ ოპოზიციაში იყოთ მუდმივად პირველები. თავდასხმებით და ბინძური ინფოებით მართულ კამპანიას ჩვენ ყოველთვის დავუპირისპირდებით. მე შეგახსენებთ წინასაარჩევნოდ "მთავარის" მიერ გაკეთებულ სიუჟეტებს, როგორ ვეკვრებოდით ვითომ ვიღაცებს და ბნელ მხარეს გადავდიოდით. ნიკა გვარამიას ჩემი ტელეფონი აქვს და შეუძლია დამირეკოს, არც კი გიკითხავთ არაფერი", - განაცხადა გიორგი ვაშაძემ.