"მიმდინარეობს ოპოზიციის ოცნებიზაცია - ჯერ იმათმა მოგვპარეს ხელისუფლება და ახლა ზუსტად იგივეს აკეთებთ თქვენ"- გვარამიას მიმართვა

პოლიტიკა - 13:49, 08 Dec, 2020

712

"მთავარი არხის" გენერალური დირექტორი ოპოზიციას მიმართავს.

ნიკა გვარამია ხელისუფლების ოპონენტებს მოუწოდებს გაასაჯაროვონ თუ რაზე მიდის "ქართულ ოცნებასთან" მოლაპარაკებები.

გვარამია ოპოზიციის მისამართით ამბობს: "ხალხისგან ფარულად თანხმდებით ჯერ ერთმანეთთან და მერე - ოცნებასთან".

"ღიად და პირდაპირ მივმართავ ოპოზიციას:

რას ნიშნავს დაუსრულებელი არგასაჯაროება და დამალვა, რაზე მიდის მოლაპარაკებები?

რატომ გვამკითხავებთ, ვინ შედის, ვინ არა, ვინ რაზე თანახმაა, ვინ რისი წინააღმდეგია?

თუ თქვენ ვერ ხვდებით, მე გეტყვით: ახლა მიმდინარეობს ოპოზიციის ოცნებიზაცია - ჯერ იმათმა მოგვპარეს ხელისუფლება და ახლა ზუსტად იგივეს აკეთებთ თქვენ - გვპარავთ სიმართლეს და მასთან ერთად ხელისულფებას, ხალხისგან ფარულად თანხმდებით ჯერ ერთმანეთთან და მერე - ქართულ ოცნებასთან.

გახსოვდეთ, ხელისუფლება წაგვართვეს ჩვენ - ხალხს, და არა თქვენ - ოპოზიციურ პარტიებს. თქვენ წარმოადგენთ ხალხს და არა საკუთარ თავს და საკუთარ ინტერესებს. კეთილი ინებეთ და ჩვენც გაგვაგებინეთ რაზე მიდის შეთანხმება/მოლაპარაკებები.

მთავარი არხის სახელით მოვითხოვ (იმედია, სხვა მედიებიც შემოგვიერთდებიან),

გასაჯაროვდეს, რაზე მიდის მოლაპარაკებები და რატომ დაემსგავსა ეს ყველაფერი ვაჭრობას;

დაიშვას მედია ოპოზიციის საერთო შეკრებებზე და მოხდეს პირდაპირი ტრანსლირება, რათა გაირკვეს, ვინ შედის, ვინ რაზეა თანახმა, ვინ უგორებს კოჭს ივანიშვილს და ვინ იცავს ხალხის პოზიციას." - წერს ნიკა გვარამია ფეისბუქზე.