თუ ტონი შეიცვლება, მზად ვარ ყველაზე აგრესიულ ოპონენტსაც კი შევხვდე - თორნიკე რიჟვაძის განცხადებით, მას აქციები დისკომფორტს არ უქმნის

პოლიტიკა - 17:11, 03 Dec, 2020

665

აჭარის მთავრობის თავმჯდომარის თორნიკე რიჟვაძის განცხადებით, თუ მომიტინგეები ტონს შეცვლიან, მზად იქნება, ყველაზე აგრესიულ ოპონენტსაც კი შეხვდეს.

რიჟვაძის განმარტებით, აქციების გამო მისი საუშაო განრიგი არ შეცვლილა და აჭარის მთავრობის სახლთან შეკრებილი მომიტინგეები მას დისკომფორტს არ უქმნიან:

"მე დისკომფორტს არანაირად არ მიქმნის და თქვენ ხედავთ ყოველდღიურად რეჟიმში ჩვენი სამუშაო განრიგი არანაირად არ შეცვლილა. მგონი დისკომფორტს თქვენ უნდა გიქმნიდეთ ეს ვაისკანდალური "ჰედლაინები", თუმცა, ეს თქვენი გადასაწყვეტია. ძალიან მალე აჭარის უმაღლესი საბჭო შეიკრიბება და დამტკიცდება მთავრობა, და ჩვეულებრივად გავაგრძელებთ ხალხის სამსახურს და იმ გამოწვევების გამკლავებას, რომელიც ამ რეგიონს აწუხებს.

რაც შეეხება კონკრეტულ პერფორმანსებსა და საცირკო წარმოდგენებს, როცა მიზანი არის კონკრეტული დესტრუქცია, კონკრეტული პერფორმანსები, რასაც თვითონაც ეძახიან, რა თქმა უნდა, ამაში ჩვენ მონაწილეობას არ მივიღებთ. არც დრო გვაქვს და არც სურვილი. როცა იქნება კონსტრუქციული ტონი და შეიცვლება ტონი მე მზად ვარ ნებისმიერ ყველაზე აგრესულ პოლიტიკურ ოპონენტს შევხვდე", - განაცხადა რიჟვაძემ.

შეგახსენებთ, რომ აჭარის მთავრობის სახლთან რამდენიმე დღეა საპროტესტო აქციები არ წყდება. აქციის მონაწილეები რიჟვაძის გადადგომასა და ხელახალი არჩევნების ჩატარებას მოითხოვენ.