"ორთვიანი გეგმის მიზანია თებერვლის დასაწყისში სრულფასოვანი ცხოვრების გაგრძელების შესაძლებლობა მოგვეცეს" - გახარიას თქმით, გამოხატვის და სიტყვის თავისუფლებას არავინ და არასდროს არ შეზღუდავს

პოლიტიკა - 11:25, 03 Dec, 2020

1000

საქართველოს პრემიერ-მინისტრის განცხადებით, გეგმასთან ერთად, დღეში გასაკეთებელი ტესტების ოდენობის 20 ათასამდე გაზრდა ხელს შეუწყობს ეპიდემიის გავრელების დონის სწრაფ გამოვლენას.

გიორგი გახარია ამბობს, რომ სახელმწიფოსთვის მნიშვნელოვანია, შეზღუდვების ფარგლებში მომავალი 2 თვის მანძილზე ვირუსის გავრცელების სისწრაფე შეაჩერონ.

მთავრობის მეთაურის განცხადებითვე, ქვეყანაში არავინ და არასდროს გამოხატვის და სიტყვის თავისუფლებას არ ზღუდავს.

"მოგეხსენებათ, რომ ჩვენ გამოვაცხადეთ მიზნობრივი, წერტილოვანი შეზღუდვების ორთვიანი კონკრეტული გეგმა, რომელმაც უნდა დაასტაბილუროს ქვეყანაში კოვიდის ინფექციის გავრცელების სისწრაფე. ჩვენ ამავდროულად, ამ ორთვიან გეგმასთან ერთად, ვაცხადებთ ინტენსიური ტესტირების ახალ გრაფიკს, რომელიც დაიწყო გუშინ და რომელიც უახლოეს პერიოდში დღეში 20 ათას ტესტს მიაღწევს. ეს არის პარალელური პროცესი, რომელმაც შეზღუდვების პერიოდში, ხელი უნდა შეუწყოს ეპიდემიის გავრცელების დონის სწრაფ გამოვლენას. მოქალაქეებს შესაძლებლობა ექნებათ, სახელმწიფოს ხარჯზე, ყოველდღიურად, 20 ათასი ტესტი გაიკეთონ, გარდა იმისა, რასაც კომერციული სექტორი გააკეთებს.

ამ ნაბიჯის მიზანია, რომ შეზღუდვების ორთვიანი გეგმა იყოს მაქსიმალურად ეფექტური, რომ ჩვენ ინფიცირების შემთხვევები მაქსიმალურად სწრაფად გამოვავლინოთ, მოვახდინოთ იზოლაცია ან მკურნალობა და თებერვლის დასაწყისში სრულფასოვანი ცხოვრების გაგრძელების შესაძლებლობა მოგვეცეს",- დასძინა პრემიერმა.

გიორგი გახარიამ შინაგან საქმეთა სამინისტროს სთხოვა, რომ წესები, რომლებიც დადგენილია და "არანაირად არ უშლიან ხელს გამოხატვის თავისუფლების სტანდარტის დაწესებას", აღსრულებული იყოს მაქსიმალური სიმკაცრით.

"ჩვენ ყველამ ერთად უნდა დავიცვათ ის კანონები და შეზღუდვები, რომლებიც უმნიშვნელოვანესია იმისთვის, რომ დავიცვათ ერთმანეთი, ჩვენი მოხუცები, რა თქმა უნდა, ქვეყანაში არავინ და არასდროს არ შეზღუდავს არც გამოხატვის თავისუფლებას, არც სიტყვის თავისუფლებას, თუმცა ის მოთხოვნები, რომლებსაც დღეს გვიყენებს კანონი, ეპიდემიოლოგები და ექიმები, არ არის ისეთი რთული, ჩვენ შეგვიძლია შევინარჩუნოთ როგორც ჩვენი გამოხატვის თავისუფელბა, ამასთან ერთად დავიცვათ ელემენტარული წესები", - თქვა გიორგი გხარიამ.